Meta-ს აღმასრულებელმა დირექტორმა მარკ ცუკერბერგმა და მისმა მეუღლემ, პრისცილა ჩანმა, ირლანდიის უოტერფორდის საგრაფოში მდებარე ისტორიული Strancally Castle შეიძინეს. გარიგება ცუკერბერგის წარმომადგენელმა დაადასტურა.
ქონება დაახლოებით 178 ჰექტარზე, ანუ 440 აკრზეა გადაჭიმული და მდინარე Blackwater-ს გადაჰყურებს. თავად ციხესიმაგრე დაახლოებით 1830 წელს აშენდა. ირლანდიის ეროვნული არქიტექტურული მემკვიდრეობის რეესტრის მიხედვით, შენობა არქიტექტორებმა ჯეიმს და ჯორჯ რიჩარდ პეინებმა ჯონ კილისთვის დააპროექტეს.
გარიგების ზუსტი ღირებულება საჯაროდ არ გამოქვეყნებულა და ის ჯერ არც ირლანდიის ქონების ფასების სახელმწიფო რეესტრში ჩანს. The Irish Times-ის შეფასებაზე დაყრდნობით, Reuters წერს, რომ ქონების ღირებულება 20 მილიონიდან 30 მილიონ ევრომდე შეიძლება იყოს. გარიგება ღია ბაზრის გარეთ, პირდაპირი შეთანხმების ფორმით განხორციელდა.
Strancally Castle-ის წინა მფლობელები საინვესტიციო კომპანია RAB Capital-ის თანადამფუძნებელი მაიკლ ალენ ბაკლი და მისი მეუღლე ჯანკარლა იყვნენ. მათ ქონება დაახლოებით 25 წლის განმავლობაში ეკუთვნოდათ და მნიშვნელოვანი სარესტავრაციო სამუშაოებიც ჩაატარეს.
ცუკერბერგის წარმომადგენლის განცხადებით, ოჯახი ისტორიული ქონების მოვლას გააგრძელებს და მას ირლანდიაში ყოფნისას გამოიყენებს. Meta-ს საერთაშორისო სათავო ოფისი დუბლინში მდებარეობს, ხოლო კომპანიას ირლანდიაში დაახლოებით 1 500 თანამშრომელი ჰყავს. ცუკერბერგი და მისი ოჯახი ძირითად საცხოვრებელ ადგილად კვლავ აშშ-ს შეინარჩუნებენ.
წყაროები:
Reuters — Mark Zuckerberg buys 19th-century castle in Ireland
The Guardian — Zuckerberg buys 440-acre Strancally Castle estate
Buildings of Ireland — Strancally Castle official architectural record
Business Insider — Zuckerberg bought an Irish castle near Meta office
