გერმანელმა ინჟინრებმა კომპანია Hamberger Medical-იდან ჩვეულებრივი უნიტაზი სამედიცინო მოწყობილობად გადააკეთეს: HARO-ს ეკგ-სავარძელს(EKG-seat)ფარული არითმიის აღმოჩენა 30 წამში შეუძლია. სენსორები პირდაპირ სავარძელშია ჩაშენებული და ახლა საკმარისია უნიტაზზე ნახევარი წუთის გატარება, რომ მოწყობილობამ პაციენტის გულისცემა ჩაიწეროს.
ჭკვიან სავარძელს HARO EKG-სკამი ეწოდება და ვიზუალურად ის ჩვეულებრივი სავარძლისგან არ განსხვავდება. ჩაშენებული სენსორები იწერენ ელექტროკარდიოგრამას და შემდეგ აგზავნიან მონაცემებს სმარტფონში, სადაც აპლიკაცია იყენებს ხელოვნურ ინტელექტს გულის ფუნქციის გასაანალიზებლად და შესაძლო ანომალიების დასადგენად. PDF ფორმატში მიღებული შედეგი შემდეგ შესაძლებელია ექიმს აჩვენონ.
უპირველეს ყოვლისა, მოწყობილობამ უნდა გამოავლინოს წინაგულების ფიბრილაცია, არითმიის ყველაზე გავრცელებული სახეობა, რომლის დროსაც გული იწყებს არარეგულარულ ცემას. საფრთხე იმაში მდგომარეობს, რომ ამ დარღვევის მქონე ადამიანების დაახლოებით მესამედს არანაირი სიმპტომი არ აღენიშნება, მიუხედავად იმისა, რომ ეს დაახლოებით ხუთჯერ ზრდის ინსულტის რისკს და შეიძლება გულის უკმარისობა გამოიწვიოს.
რუტინული გამოკვლევის დროს არითმიის აღმოჩენა შეიძლება რთული იყოს, რადგან ის შეიძლება ხანმოკლედ გამოვლინდეს და შემდეგ გაქრეს. ექიმის კაბინეტში რუტინული ეკგ-ს დროს შესაძლოა გული ნორმალურად ფუნქციონირებდეს და გამოკვლევამ რაიმე დარღვევა არ გამოავლინოს. უნიტაზს, რომლითაც ყოველდღე სარგებლობენ, გაცილებით მეტი შესაძლებლობა აქვს სახიფათო გაუმართაობის აღმოსაჩენად.
დეველოპერებმა უკვე შეადარეს ჭკვიანი სავარძლის ჩვენებები ჩვეულებრივი სამედიცინო ელექტროკარდიოგრაფის ჩვენებებს. კვლევამ აჩვენა, რომ ორივე სისტემამ მაღალი ხარისხის თანხვედრა აჩვენა არითმიის და გულის რიტმის სხვა დარღვევების გამოვლენაში. მოწყობილობის გამოყენების გარკვევა არ მოუწევთ — ტესტის მონაწილეები მას განსაკუთრებული ინსტრუქციების გარეშე იყენებდნენ და მათგან ყველაზე ხანდაზმული 90 წელს გადაცილებული იყო.
