Volkswagen-მა თავისი ოსნაბრიუკის ქარხნის საინვესტიციო კომპანია Aurelius–ისთვის“ და ქვემო საქსონიის ფედერალური მიწის ხელისუფლებისთვის მიყიდვის პირობები შეათანხმა, იუწყება Die Zeit. დაგეგმილია, რომ ქარხანა თანდათანობით გადაიქცეს უსაფრთხოებისა და თავდაცვის გადაწყვეტილებების შემუშავებისა და წარმოების ცენტრად — ეს იქნება გერმანიაში პირველი საავტომობილო ქარხანა, რომელიც სამხედრო პროდუქციის წარმოებისთვის გადაკეთდება, – აღნიშნავს გაზეთი.
ქარხნის პირველი მსხვილი პარტნიორი, სავარაუდოდ, ისრაელის თავდაცვის კომპანია Rafael იქნება, რომელიც აწარმოებს საჰაერო თავდაცვის სისტემებს, მართვად რაკეტებს და ელექტრონული საბრძოლო სისტემებს, ასევე შეიმუშავა რაკეტსაწინააღმდეგო თავდაცვის სისტემა „რკინის გუმბათი“.
პირველ ეტაპზე პარტნიორები განიხილავენ ოსნაბრიუკში საჰაერო თავდაცვის სისტემების კომპონენტების შემუშავებისა და წარმოების შესაძლებლობას. Volkswagen-ის სამუშაო საბჭოს მონაცემებით, ახალი პროექტი კომპანიის 1800 თანამშრომლიდან დაახლოებით 1400-ს, ანუ სამუშაო ძალის სამ მეოთხედს, სამუშაო ადგილებს შეუნარჩუნებს.
გაყიდვა ჯერ საბოლოოდ არ გაფორმებულა. მხარეები უნდა შეთანხმდნენ ახალი კომპანიის ფინანსურ და ორგანიზაციულ სტრუქტურაზე, გადაანაწილონ უფლებამოსილებები და მიიღონ თანხმობა კორპორატიული ორგანოებისა და მარეგულირებელი ორგანოებისგან.
///
ოსნაბრიუკის ქარხანა შეიქმნა Karmann-ის ქარხნის ბაზაზე, რომელიც 1949 წლიდან აწარმოებდა Volkswagen Beetle კაბრიოლეტებს, ხოლო მოგვიანებით სხვადასხვა ავტომწარმოებლისთვის კაბრიოლეტებისა და სპორტული კუპეების მცირე სერიებს. Karmann-ის გაკოტრების შემდეგ, 2009 წელს, წარმოების მნიშვნელოვანი ნაწილი Volkswagen-მა შეიძინა.
