გემი, რომელზეც ჰანტავირუსი გავრცელდა და შედეგად სამი ადამიანი გარდაიცვალა, ბიოუსაფრთხოების პროცედურების გავლის შემდეგ ახალ მარშრუტზე გადის. ამ თემაზე Reuters და New York Post წერენ.
მაისში, საკრუიზო გემ MV Hondius-ზე, რომელსაც 28 ქვეყნიდან დაახლოებით 150 მგზავრი და ეკიპაჟის წევრი გადაჰყავდა, იდუმალი დაავადება გავრცელდა. მგზავრებს შორის დაავადების გავრცელების პროცესი სწრაფად გადაიზარდა გლობალური საზოგადოევრივი ჯანდაცვის საფრთხეში.
საბოლოოდ დადასტურდა გემზე ჰანტავირუსის 13 შემთხვევა, რომელთაგან სამი გარდაიცვალა. დაავადება, სავარაუდოდ, გავრცელდა ორი მგზავრისგან, რომლებიც არგენტინაში ფრინველებზე დაკვირვების დროს ინფიცირებულ მღრღნელებთან კონტაქტში შევიდნენ.
დაღუპულთა შორის იყვნენ ჰოლანდიელი წყვილი, რომელიც უკანონო ნაგავსაყრელს ეწვია, და გერმანელი მგზავრი. გარდა ამისა, ბრიტანეთის მოქალაქე ინტენსიური თერაპიის განყოფილებაში მოათავსეს, ხოლო გემზე მყოფი სხვა მგზავრები სიფრთხილის ზომების სახით სხვადასხვა პორტში გადაიყვანეს და კარანტინში მოათავსეს.
ამ ეტაპზე გემი სრულად დეზინფიცირებულია. მომხდარის შემდეგ, ნიდერლანდების ჯანდაცვის ორგანოებმა გემზე ბიოუსაფრთხოების ფართომასშტაბიანი ოპერაცია ჩაატარეს. გემის მფლობელმა, Oceanwide Expeditions-მა, განაცხადა, რომ რვაგემბანიანი მასიური გემის ყველა ნაწილი საფუძვლიანად გაიწმინდა და შიგნით მღრღნელები არაა. ხელისუფლებამ განაცხადა, რომ ჰანტავირუსს გარე გარემოში დაბალი მდგრადობა აქვს და ინტენსიურმა დეზინფექციამ სრულად გამორიცხა ხელახალი ინფიცირების შესაძლებლობა. გემის გაწმენდის შემდეგ, ნიდერლანდების ხელისუფლებამ საკრუიზო გემს 30 მაისიდან ნაოსნობის განახლების ნებართვა მისცა.
უსაფრთხოების ზომების უმაღლეს დონეზე უზრუნველყოფის მიზნით, კომპანიამ აფეთქების დროს გემზე მყოფი ეკიპაჟის ყველა წევრის ევაკუაცია და კარანტინში მოთავსება მოახდინა. გემის პერსონალი მთლიანად შეიცვალა და ხაზგასმით აღინიშნა, რომ ახალ ეკიპაჟს კარანტინში მყოფ არცერთ თანამშრომელთან კონტაქტი არ ჰქონია.
ლოჯისტიკისა და მომზადების პროცესში მყოფი MV Hondius სეზონის პირველ არქტიკულ მოგზაურობას 6 ივნისს დაიწყებს. გემი ნორვეგიიდან, კერძოდ ლონგიარბიენიდან გაემგზავრება, რომელიც მსოფლიოში ყველაზე ჩრდილოეთით მდებარე დასახლებული პუნქტია. არსებული მონაცემებით, ბილეთების დიდი ნაწილი, რომლებიც ერთ ადამიანზე 4000-დან 14 ათასამდე დოლარი ღირს (7–8-დღიანი არქტიკული რეისების შემთხვევაში), უკვე გაყიდულია.
ჰანტავირუსის შემთხვევის შემდეგ დაგეგმილი პირველი რეისი 13 ივნისს იწყება. საინტერესოა, რომ ყველაზე იაფი ადგილები საკმაოდ სწრაფად გაიყიდა და ივნისის ზოგიერთი რეისი სრულად დაჯავშნილია, რაც მიუთითებს, რომ, მომხდარის მიუხედავად, მოთხოვნა მნიშვნელოვნად არ შემცირებულა.
ჩვეულებრივ, ჰანტავირუსი ადამიანებს მღრღნელების შარდთან ან განავალთან კონტაქტით გადაეცემა. თუმცა, ჯანდაცვის მსოფლიო ორგანიზაცია ამ რეისის დროს ადამიანიდან ადამიანზე უჩვეულო გადაცემის შესაძლებლობას განიხილავს. ის ფაქტი, რომ საფრანგეთის მოქალაქე, რომელიც გემზე არ იმყოფებოდა, ვირუსით დაინფიცირდა თვითმფრინავში ინფიცირებულ მგზავრთან ერთად მგზავრობის შემდეგ, ამ შეშფოთებას ამართლებს. საფრანგეთში, პასტერის ინსტიტუტის მეცნიერებმა ვირუსის გენეტიკური შემადგენლობა გამოიკლვლიეს და დაადგინეს, რომ ის ემთხვეოდა სამხრეთ ამერიკაში უკვე არსებულ „ანდების“ ვარიანტს. მკვლევარებმა ვერ აღმოაჩინეს ახალი მუტაციები, რომლებიც ვირუსს უფრო გადამდებს ან უფრო საშიშს გახდიდა. ვინაიდან ამჟამად არ არსებობს ვაქცინა ან სპეციფიკური მკურნალობა ჰანტავირუსისთვის, დაცვის ყველაზე ეფექტური მეთოდებია ჰიგიენა და რისკისშემცველი კონტაქტების თავიდან აცილება.
