CNN-ის ცნობით, ჰარვარდის უნივერსიტეტის საერთაშორისო სტუდენტები „ნამდვილ პანიკაში“ არიან ტრამპის ადმინისტრაციის მიერ საერთაშორისო სტუდენტების მიღების აკრძალვის გადაწყვეტილების გამო.
საქმე ისაა, რომ ტრამპის მთავრობამ ამ კვირაში ჰარვარდს ჩამოართვა უცხოელი სტუდენტების მიღების უფლება, თუმცა პარასკევს, 23 მაისს, აშშ-ის ფედერალურმა სასამართლომ დროებით დაბლოკა ეს გადაწყვეტილება მას შემდეგ, რაც უნივერსიტეტმა აშშ-ის ადმინისტრაციის წინააღმდეგ სარჩელი შეიტანა.
ჰარვარდის უნივერსიტეტის მენეჯმენტმა განაცხადა, რომ აკრედიტაციის გაუქმება „აშკარა შურისძიება“ იყო მთავრობის მოთხოვნების შესრულებაზე უარის თქმისთვის, მათ შორის „ამერიკული ღირებულებებისა და ინსტიტუტების მიმართ მტრულად განწყობილი“ სტუდენტების მიღების აკრძალვისთვის.
"ათასობით საერთაშორისო სტუდენტი შეშფოთებულია, რომ მათი ვიზები გაუქმდება და შეერთებულ შტატებში ხელახლა შესვლა აეკრძალებათ, ხოლო სწავლა შეჩერდება. ხალხმა არ იცის, რა არის მათი ამჟამინდელი იურიდიული სტატუსი," - განუცხადა CNN-ს ჰარვარდის სტუდენტური საბჭოს თანათავმჯდომარემ აბდულა შაჰიდ სიალმა.
ამჟამად ჰარვარდს 6,793 საერთაშორისო ბაკალავრიატისა და მაგისტრატურის სტუდენტი ჰყავს, რაც სტუდენტთა საერთო რაოდენობის 27%-ს შეადგენს.
„ბევრმა ჩვენგანმა მთელი ცხოვრება იშრომა, რომ ჰარვარდის მსგავს უნივერსიტეტში მოხვედრილიყო და ახლა ლოდინი და იმაზე ფიქრი გვიწევს, მოგვიწევს თუ არა სხვა უნივერსიტეტში გადასვლა“, - თქვა ავსტრიიდან მესამე კურსის სტუდენტმა კარლ მოლდენმა.
გარდა ამისა, შეიარაღებული კონფლიქტის მდგომარეობაში მყოფი ქვეყნებიდან სტუდენტებისთვის სახიფათოა მშობლიურ ქვეყნებში დაბრუნება; CNN-ის ცნობით, ზოგიერთისთვის პოლიტიკური დევნის რისკი არსებობს.
შეგახსენებთ, ჰარვარდის უნივერსიტეტის ადმინისტრაცია თვეების განმავლობაში უთანხმოებაში იყო ტრამპის ადმინისტრაციასთან ისრაელის ღაზას სექტორში შეტევის საპასუხოდ კამპუსში გამართული პრო-პალესტინისტური აქციების გამო. გასულ წელს, უნივერსიტეტი, აშშ-ის სხვა მრავალი უნივერსიტეტისა და კოლეჯის მსგავსად, კრიტიკის ქარცეცხლში მოექცა პრო-პალესტინის საპროტესტო აქციების არასწორად მართვისა და ებრაელი კურსდამთავრებულებისა და სტუდენტების ანტისემიტიზმის შესახებ საჩივრების გამო. ჰარვარდმა ეს პრობლემა აღიარა და პირობა დადო, რომ გამოასწორებდა ამას.
ისრაელელი პოსტდოქტორანტი მიიჩნევს, რომ ტრამპის ადმინისტრაცია ებრაელ სტუდენტებს „პაიკებად“ იყენებს მათი უსაფრთხოების უზრუნველსაყოფად ნაბიჯების გადადგმის ნაცვლად. მისი აზრით, ჰარვარდის ხელმძღვანელობა სერიოზულად ეკიდება კამპუსში ანტისემიტიზმის პრობლემას.
