შიდა სახმელეთო წყლებში ჩართული სატრანსპორტო საშუალებების სახელმწიფო რეგისტრაცია სავალდებულო 1 ოქტომბრიდან გახდება. მანამდე კი, 2025 წლის 1 აპრილიდან 1 ოქტომბრამდე გარდამავალი პერიოდია, რომლის განმავლობაშიც, დაინტერესებულ პირებს შეუძლიათ ნებაყოფლობით მიმართონ საქართველოს საზღვაო ტრანსპორტის სააგენტოს სატრანსპორტო საშუალების რეგისტრაციისა და მართვის სერტიფიკატის მისაღებად.
როგორც bm.ge-ის სსიპ საზღვაო ტრანსპორტის სააგენტოდან გამოთხოვილი ინფორმაციის საპასუხოდ აცნობეს, 4 აგვისტოს მდგომარეობით, სააგენტოში რეგისტრირებული იყო მხოლოდ ორი სატრანსპორტო საშუალება, ხოლო ძრავის მქონე სატრანსპორტო საშუალების მძღოლის მართვის სერტიფიკატი გაცემული იყო რვა პირზე.
აღსანიშნავია, რომ რეგისტრაცია აუცილებელია ყველა ტიპის მცურავი საშუალებისთვის, რომელიც გამოიყენება შიდა სახმელეთო წყლებში სამგზავრო და სატვირთო გადაზიდვებისათვის, რეკრეაციული ან სპორტული დანიშნულებით. საკანონმდებლო რეგულაციები ეხება ყველა ტრანსპორტს, რომელიც გადაადგილდება ქვეყნის შიგნით, მდინარეებზე, ტბებსა და წყალსაცავებზე.
სატრანსპორტო საშუალების რეგისტრაცია რეესტრში მუდმივია, ხოლო სარეგისტრაციო მოწმობა გაიცემა 1 წლის ვადით და განახლდება ყოველწლიურად.
