რუსეთში ელექტრონიკისა და მაღალტექნოლოგიური საქონლის სანქციების გვერდის ავლით მიწოდების ერთ-ერთი მთავარი ჰაბი არსებობას წყვეტს. ამის შესახებ ubnovini.com წერს.
ყაზახეთმა, რუსეთის ერთ-ერთმა უმსხვილესმა სავაჭრო პარტნიორმა პოსტსაბჭოთა სივრცეში და ОДКБ-ს სამხედრო ბლოკის წევრმა, რუსეთის ფედერაციაში 106 სახეობის საქონლის ექსპორტზე აკრძალვა დააწესა. ამის შესახებ ხუთშაბათს ყაზახეთის ვაჭრობისა და ინტეგრაციის ვიცე-მინისტრმა კაირატ ტორებაევმა განაცხადა.
საექსპორტო კონტროლი ისეთივეა, როგორიც დასავლეთის ქვეყნებმა დააწესეს უკრაინაში ომის დაწყების შემდეგ. ჩინოვნიკის თქმით, აკრძალვა შეეხება ჩიპებს და იმ ელექტრონიკას, რომელიც შეიძლება გამოყენებულ იქნას ომში.
„აღნიშნული 106 საქონელი არ იწარმოება ყაზახეთში, მაგრამ ადრე რეექსპორტი იყო ყაზახეთის გავლით. იმპორტი ყაზახეთში ხორციელდება, ექსპორტი კი არა. ისინი იწარმოება არა მხოლოდ დასავლეთში, არამედ სხვა ქვეყნებშიც“, - განმარტა ტორებაევმა.
მთლიანობაში, ყაზახეთისა და სხვა პარალელური იმპორტის ჰაბების მეშვეობით (საქართველო, სომხეთი, თურქეთი, უზბეკეთი, აზერბაიჯანი, ყირგიზეთი და ტაჯიკეთი) რუსეთმა მხოლოდ ევროკავშირიდან 2023 წლის პირველ ნახევარში 14,1 მილიარდი დოლარის საქონელი შეიტანა.
2022 წლის ანალოგიურ პერიოდთან შედარებით, ასეთი იმპორტის მოცულობა თითქმის 60%-ით, ანუ 5,2 მილიარდი დოლარით გაიზარდა და მისი ძირითადი პუნქტები იყო ტელეკომის აღჭურვილობა, მიკროელექტრონიკა, ელექტრომოწყობილობა, სატრანსპორტო აღჭურვილობა, კომპიუტერები, სერვერები, მყარი დისკები და სმარტფონები.
რუსეთის ფედერაციაში მეზობელი ქვეყნების გავლით სანქცირებული საქონლის ნაკადებმა დასავლელი ოფიციალური პირების შეშფოთება გამოიწვია, რომლებიც მეორადი სანქციებით დაემუქრნენ მათ, ვინც ხელს უწყობს დაწესებული საექსპორტო შეზღუდვების გვერდის ავლას.
სექტემბერში აშშ-ს ხაზინამ შავ სიაში შეიყვანა 150 იურიდიული და ფიზიკური პირი, მათ შორის კომპანიები თურქეთიდან და ფინეთიდან, აღმოჩნდა, რომ ამარაგებდნენ რუსეთის სტრუქტურებს, რომლებიც დაკავშირებული იყვნენ სამხედრო დრონებისა და ფრთოსანი რაკეტების წარმოებასთან.
ყაზახეთის მხრიდან სასანქციო ზომების შემოღების შესახებ ცნობილი გახდა ქვეყანაში გერმანიის კანცლერის ოლაფ შოლცის ვიზიტიდან რამდენიმე კვირაში. მასთან მოლაპარაკების შემდეგ, რესპუბლიკის პრეზიდენტმა კასიმ ჟომარტ ტოკაევმა დაადასტურა რუსეთის წინააღმდეგ სანქციების შესრულების განზრახვა.
„ჩვენ გვაქვს კონტაქტები შესაბამის ორგანიზაციებთან სანქციების რეჟიმის დაცვასთან დაკავშირებით, და ვფიქრობ, რომ გერმანულ მხარეს არ უნდა ჰქონდეს შეშფოთება სანქციების რეჟიმის გვერდის ავლით შესაძლო ქმედებებთან დაკავშირებით“, - განაცხადა ტოკაევმა.
შემდეგი შეიძლება იყოს რუსული პარალელური იმპორტის ჰაბი არაბეთის გაერთიანებულ საემიროებში. Bloomberg-ის ცნობით, ქვეყნის ხელისუფლება განიხილავს რუსეთის წინააღმდეგ საექსპორტო კონტროლის შემოღების შესაძლებლობას. არაბეთის გაერთიანებული საამიროების ზომებმა შეიძლება გავლენა მოახდინოს ჩიპებზე და ათობით სხვა ორმაგი დანიშნულების საქონელზე, რომლებიც შეიძლება გამოყენებულ იქნას იარაღის დასამზადებლად.
