პრივატბანკის თანხების გაფლანგვის საქმეზე პატიმრობაში მყოფმა ოლიგარქმა იგორ კოლომოისკიმ მედიაჰოლდინგ 1+1-ში თავისი კორპორატიული უფლებები თანამშრომლების კოლექტივს გადასცა, რომელთა წარმომადგენელიც ამჟამინდელი გენერალური დირექტორი იაროსლავ პახოლჩუკია. ამის შესახებ 1+1 მედიის განცხადებაშია ნათქვამი.
კორპორატიული უფლებების გადაცემის შესახებ გადაწყვეტილება კოლომოისკიმ 23 ოქტომბერს მიიღო და შესაბამისი განცხადებით მედია ჯგუფის მუშაკებს და ტელევიზიისა და რადიომაუწყებლობის ეროვნულ საბჭოს მიმართა.
„მივიღე გადაწყვეტილება, რომ ჩემი კუთვნილი კორპორატიული უფლებები შრომითი კოლექტივის მმართველობაში გადავცე, რომელთაც წარმოადგენს გენერალური დირექტორი იაროსლავ პახოლჩუკი. რომელიც, როგორც წარმომადგენელი, იმოქმედებს კომპანიების ინტერესებიდან გამომდინარე და შრომითი კოლექტივის სახელით“, - ნათქვამია იგორ კოლომოისკის ოფიციალურ განცხადებაში.
1+1 განცხადებაში ნათქვამია, რომ კორპორატიული უფლებების მართვის უფლებამოსილება ითვალისწინებს მენეჯერის უფლებამოსილებას, მიიღოს საკუთარი სახელით საჭირო გადაწყვეტილებები, გარდა კოლომოისკის საკუთრებაში არსებული კორპორატიული უფლებების გასხვისებისა და/ან დატვირთვისა და დივიდენდების მიღებისა.
„კორპორაციული უფლებების მენეჯმენტზე გადაცემა არ გამოიწვევს 1+1 მედია ჯგუფის საბოლოო ბენეფიციარი მფლობელის ცვლილებას; გადამწყვეტი გავლენა (კონტროლი) რჩება იგორ კოლომოისკის“, - ნათქვამია მედია ჯგუფის განცხადებაში.
კორპორატიული უფლებების გადაცემის გადაწყვეტილება მიღებულ იქნა 5 წლის ვადით. 1+1 ამას განმარტავს „სიტყვის თავისუფლების, მიუკერძოებლობისა და მოვლენების ობიექტური გაშუქების პრინციპების დაცვისა და პატივისცემის აუცილებლობით, რაც მნიშვნელოვანი ფაქტორებია მედია კომპანიის არსებობისთვის დიდ ომში“. და ასევე იმიტომ, რომ ამჟამად კოლომოისკი სრულად ვერ ახორციელებს თავის უფლებამოსილებებს. ოლიგარქი 2 სექტემბრიდან პატიმრობაში იმყოფება.
„დღეს უაღრესად მნიშვნელოვანია, განსაკუთრებით ტურბულენტობისა და სრულმასშტაბიანი შემოჭრის პირობებში, შენარჩუნებული იქნას მუშაობის მექანიზმი, რომელიც წლების განმავლობაში ჩამოყალიბდა და უზრუნველყოს გუნდის მუშაობის უწყვეტობა, რათა შეასრულოს მისთვის დაკისრებული ამოცანები ქვეყნის საინფორმაციო თავდაცვის შესაძლებლობებთან დაკავშირებით“, - ნათქვამია კოლომოისკის განცხადებაში.
