გლობალური დათბობის გამო, ტყის ხანძრები შესაძლოა გავრცელდეს ისეთ რეგიონებში, რომლებსაც ეს აქამდე არასდროს განუცდიათ. და ამ რეგიონებმა უნდა ისწავლონ ამ რისკთან ერთად ცხოვრება, წერს Futura Sciences.
საფრანგეთში მასშტაბური ტყის ხანძრების რისკი ინდუსტრიამდელ დონესთან შედარებით გაორმაგდა, ესპანეთში კი ოცი-ჯერ მეტია. მაგალითად, საფრანგეთში 2026 წლის დასაწყისიდან თითქმის 960 კვადრატული კილომეტრი ტყე დაიწვა. ეს დაახლოებით შვიდ-ჯერ მეტია ბოლო 20 წლის საშუალო მაჩვენებელზე.
ევროპაში ტყის ხანძრის 10-დან 9 ადამიანის საქმიანობით არის გამოწვეული და მათი თავიდან აცილება შესაძლებელი იყო. გამომწვევი მიზეზებია ჩაუმქრალი სიგარეტის ნამწვი, გადაყრილი სიგარეტი, არასწორად დამონტაჟებული მწვადები ან სამუშაოს დროს წარმოქმნილი ნაპერწკლები. ტყის ხანძრების 90%-ს ცეცხლის წაკიდება, უბედური შემთხვევები და დაუდევრობა შეადგენს. კლიმატის ცვლილება კი ქმნის იდეალურ პირობებს ხანძრების გავრცელებისთვის - ევროპაში ახლა უფრო ცხელი, მშრალი და ქარიანი ამინდია.
რას ამბობს მეცნიერება
პოტსდამის კლიმატის ზემოქმედების კვლევის ინსტიტუტის კვლევა ადასტურებს შეშფოთებას, რომ უფრო ცხელმა, მშრალმა და ქარიანმა პირობებმა შეიძლება მნიშვნელოვნად გაზარდოს ტყის ხანძრებისადმი მიდრეკილების არეალი მთელ ევროპაში.
„თუ ხანძარი უკიდურეს ინტენსივობას მიაღწევს, შესაძლოა, მისი შეკავების ჩვენი უნარი ამოწურული იყოს და ჩვენ ჯერ კიდევ არ ვიცით ზუსტად სად არის ეს გარდამტეხი წერტილი. საფრანგეთში ბოლო დროს მომხდარი რეკორდული ხანძრები ნათლად აჩვენებს, რომ ჩვენ არ შეგვიძლია მონაცემების უბრალოდ ექსტრაპოლაცია წარსულში განცდილ მონაცემებზე დაყრდნობით“, - ამბობს კვლევის თანაავტორი თომას ჰიკლერი.
ზენკენბერგის ბუნების კვლევის საზოგადოების (გერმანია) მონაცემებით, ტყის ხანძრების ჩაქრობის მეთოდების უწყვეტმა გაუმჯობესებამ შეიძლება შეამციროს დამწვარი ტერიტორიების ფართობი. თუმცა, ეს მნიშვნელოვან ინვესტიციებს მოითხოვს. მაგალითად, საფრანგეთში მუშავდება FireWatch პლატფორმა, რომელიც აერთიანებს თანამგზავრულ მონაცემებსა და ხელოვნურ ინტელექტს. მოსალოდნელია, რომ ის ხანძრის ჩაქრობაში მყოფი მეხანძრეებისთვის ღირებულ ინსტრუმენტად იქცეს.
