თბილისის მერია საახალწლო ღონისძიებებზე დაახლოებით 9 მლნ ლარის დახარჯვას გეგმავს. ამის შესახებ სახელმწიფო შესყიდვების სააგენტოს მიერ გამოქვეყნებული განცხადებიდან ხდება ცნობილი.
თბილისის მერიამ 2025 წლის შობა-ახალი წლის დღესასწაულის ორგანიზებისთვის რამდენიმე შესყიდვა უკვე გამოაცხადა. თუმცა მათ შორის, მთავარი შესყიდვა გამარტივებული მეთოდით გამოცხადდა, რომლის ღირებულება 8 576 967 ლარია და საახალწლო კონცერტის და საშობაო სოფლის მოწყობას გულისხმობს.
დოკუმენტების მიხედვით, მიმწოდებელმა 2024 წლის 13 დეკემბრიდან 2025 წლის 15 იანვრის ჩათვლით, დედაქალაქის რამდენიმე ქუჩაზე „საშობაო ქალაქი“ უნდა მოაწყოს.
გარდა ამისა, დოკუმენტის მიხედვით ცნობილი ხდება, რომ რუსთაველის გამზირზე, პარლამენტის წინ, მთავარი ნაძვის ხე 6 დეკემბერს აინთება. 31 დეკემბერს კი პირველი რესპუბლიკის მოედანზე საახალწლო გალა კონცერტი გაიმართება.
„2025 წლის შობა-ახალი წლის დღესასწაულთან დაკავშირებით 2024 წლის 13 დეკემბრიდან 2025 წლის 15 იანვრის ჩათვლით, ქალაქ თბილისში, ორბელიანის მოედნის მიმდებარე ტერიტორიაზე (მშრალი ხიდის მიმდებარე ტერიტორია, გიორგი ათონელის ქუჩა, იტალიის ქუჩა, ხაზინის ქუჩა, ფხოვის ქუჩა, ანტონ ფურცელაძის ქუჩა) მშრალ ხიდზე, დედაენის ბაღში და „იუსტიციის სახლის“ ავტოსადგომის მიმდებარე ტერიტორიაზე ქალაქ თბილისის მუნიციპალიტეტის მერია ,,საახალწლო ქალაქის“ მოწყობას და მრავალფეროვანი გასართობი/სანახაობრივი ღონისძიებების გამართვას გეგმავს. ქალაქის მოსახლეობის და თბილისის სტუმრებისთვის მოწყობილი საახალწლო სივრცეები საინტერესო წარმოდგენა-პერფორმანსებით, კულტურული, სპორტული, საგანმანათლებლო, საბავშვო, სხვადასხვა თემატური აქტივობებით და განსხვავებული ჟანრის კონცერტებით დაიტვირთება. ღონისძიებების პროგრამა 2024 წლის 6 დეკემბერს, საქართველოს პარლამენტის მიმდებარე ტერიტორიაზე (შოთა რუსთაველის გამზირი) ცენტრალური ნაძვის ხის ანთების ცერემონიით გაიხსნება.
აღნიშნულ ლოკაციებზე განთავსდება მოცულობითი დეკორაცია/ინსტალაცია, თემატური მორთულობები, ფოტოზონა, დეკორირებული ჯიხურები და დახლები, თაღები, დეკორირებული ნაძვის ხეები, საციგურაო ყინულის მოედანი შესაბამისი დეკორაციით, ხიდის, ქუჩების და ფასადების თემატური მორთულობები, საბავშვო-საგამოფენო პავილიონები, მრავალფეროვანი დეკორაცია/ბუტაფორია/რეკვიზიტი, ავეჯი საბავშვო სივრცისთვის, კულტურული, სპორტული და მოსასვენებელი სივრცეები, თოვლის ბაბუას (სანტას სახლი) და სახელოსნო. გაიმართება საახალწლო სოფლის გახსნის ღონისძიება, სხვადასხვა ჟანრის კონცერტები, ელექტრონული ლაივ შოუები, თეატრალური წარმოდგენა-პერფორმანსები.
მოეწყობა მრავალფეროვანი კულტურული, სპორტული, საგანმანათლებლო და საბავშვო-გასართობი აქტივობები, ღია კინოთეატრი, ზღაპრის გმირების მსვლელობა, ღონისძიებაზე მისულ დამთვალიერებლებს დახვდებათ თოვლის ბაბუა (სანტა) დამხმარე მსახიობებთან ერთად. ღონისძიებების ფარგლებში მოეწყობა ,"ტკბილეულის ფესტივალი“, გამოფენა-გაყიდვა "თბილისის საშობაო ბაზარი“, რომლის ფარგლებში გაიმართება ხელნაკეთი ნივთების გამოფენა-გაყიდვა, მოეწყობა ტკბილეულის და კვების სივრცეები, გასტრონომიული ზონები, რაც კომპლექსურად გულისხმობს გასტრონომიული ინდუსტრიის ხელშეწყობას, ადგილობრივი მცირე და საშუალო ზომის ფიზიკური და იურიდიული პირების საქმიანობის მხარდაჭერას და პოპულარიზაციას.
ღონისძიებების ფარგლებში 2024 წლის 31 დეკემბერს, პირველი რესპუბლიკის მოედანზე ჩატარდება საახალწლო გალა კონცერტი“, - წერია გამოქვეყნებულ განცხადებაში.
გარდა ამისა, თბილისის მერიამ დამატებით რამდენიმე ელექტრონული ტენდერი გამოცხადდა, რომელიც ღონისძიების ინვენტარს, აპარატურას, სცენის მოწყობას და სხვა საჭირო მომსახურებას გულისხმობს.
