30 ივნისიდან 2 ივლისის ჩათვლით, თბილისში პლასტიკური ქირურგიისა და დერმატოლოგიის მე-17 საერთაშორისო კონგრესი - „კოლხიდა 2023“ გაიმართება. ღონისძიების ორგანიზატორია სახისა და სხეულის გადასაჭიმი, მსოფლიოში ცნობილი აპტოსის ძაფების გამომგონებელი და მწარმოებელი კომპანია „აპტოსი“, რომელიც დამსწრეებს უნიკალურ ფორმატსა და დაუვიწყარ გამოცდილებას ჰპირდება. „კოლხიდა 2023“ რედისონ ბლუ ივერია & ბილტმორის სასტუმროში ჩატარდება.
ღონისძიებაში მონაწილეობას მიიღებს 90-ზე მეტი ქვეყნიდან 1 000-ზე მეტი დელეგატი, მათ შორის იქნება მსოფლიოში ცნობილი და წამყვანი 120 სპიკერი. კონგრესი ამ წელსაც აგრძელებს ტრადიციას და დამსწრე პროფესიონალებს გაუზიარებს ცოდნას პლასტიკურ ქირურგიაში, დერმატოლოგიასა და ესთეტიკურ მედიცინაში.
ამასთან ერთად, „კოლხიდა 2023“ უმასპინძლებს ესთეტიკურ ინდუსტრიაში წამყვანი ბრენდების გამოფენას, სადაც ნაჩვენები იქნება პლასტიკურ ქირურგიაში არსებული უახლესი მიღწევები და ულტრათანამედროვე დერმატოლოგიური პროდუქტები.
„ღონისძიების დამსწრეებს არაჩვეულებრივი შესაძლებლობა ექნებათ მოუსმინონ ქართველ და უცხოელ სპეციალისტებს, რომლებიც გააზიარებენ თავიანთ გამოცდილებას პლასტიკურ ქირურგიასა და დერმატო-კოსმეტოლოგიაში. წინა წლების მსგავსად, წლევანდელი კონგრესის ფარგლებშიც, მონაწილეები დაესწრებიან თეორიულ და პრაქტიკულ სესია-სემინარებს. ეს კი უფრო დაგვეხმარება, შევქმნათ დაუვიწყარი გამოცდილება, რაც, თავის მხრივ, პროფესიონალ ექიმებს შორის გახდება დასაბამი ახალი და ღირსეული თანამშრომლობის“, - ამბობს „აპტოსის“ მარკეტინგის დირექტორი ალექსანდრე ჩიქობავა.
