ხელოვნური ინტელექტის გამოყენებით, მეცნიერებმა საბერძნეთის კუნძულ სანტორინიზე ათასობით მიწისძვრის მიზეზი დაადგინეს - როგორც აღმოჩნდა, ამის მიზეზი მაგმის (გამდნარი ქანის) მიწისქვეშა მოძრაობა იყო.
ბერძნული კუნძულების, სანტორინის, ამორგოსისა და ანაფის მახლობლად სეისმური აქტივობა 2025 წლის იანვარში გაიზარდა. ტერიტორიაზე ათიათასობით მიწისძვრა მოხდა, რომელთაგან ბევრის სიმძლავრემ 5.0 მაგნიტუდას გადააჭარბა.
მეცნიერებმა სანტორინის გარშემო დედამიწის ქერქის 3D რუკა შექმნეს. შემდეგ კი თითოეული ბიძგის პარამეტრები და შესაბამისი მოძრაობა აღწერეს. ამან მათ საშუალება მისცა, შეექმნათ დეტალური მოდელი იმისა, თუ რამ გამოიწვია მიწისძვრების სერია.
მკვლევართა ჯგუფმა დაადგინა, რომ აქტივობა გამოწვეული იყო სანტორინის კუნძულისა და კოლუმბოს ვულკანის ქვეშ ჰორიზონტალური მაგმის მოძრაობით. ვარაუდობენ, რომ ქერქში გავლილი მაგმის მოცულობას 200 000 ოლიმპიური ზომის საცურაო აუზის შევსება შეეძლო. ეს „შეჭყლეტები“, როგორც მათ გეოლოგიაში უწოდებენ, გზაზე კლდის ფენებს არღვევდა და ათასობით რყევას იწვევდა.
მკვლევარები ამბობენ, რომ ხელოვნური ინტელექტის გამოყენება, დედამიწის ქერქის მოძრაობის ფუნდამენტური პრინციპების ცოდნასთან ერთად, საშუალებას იძლევა, გაცილებით უკეთ აკონტროლონ, გაიგონ და იწინასწარმეტყველონ კიდეც ვულკანური აქტივობა. შედეგად, ისინი შეძლებენ სეისმურად აქტიურ რეგიონებში მცხოვრები ადამიანების დაცვას.
