საქართველოს ეროვნული ბანკის პრეზიდენტის მოვალეობის შემსრულებლის ნათია თურნავას განცხადებით, ეროვნული ბანკის მმართველობას საფრთხე, დეკემბერში საბჭოს ორ წევრის, არჩილ მესტვირიშვილისა და რობერტ სინგლეტარის საქმიანობის ვადის გასვლის მიუხედავად, არ დაუდგება.
„ეროვნული ბანკის მმართველობას და მის ქმედუნარიანობას საფრთხე არ დაუდგება არც დეკემბერში, არც იანვარში, არც 2025 წლის დეკემბერში“, - აღნიშნა თურნავამ.
ნათია თურნავას თქმით, ეროვნული ბანკის მთავარი ამოცანა, ფასების სტაბილურობის დონის მიღწევა და ფინანსური სექტორის სტაბილურობაა, გარდა ამისა ფინანსებზე მოსახლეობისა და ბიზნესის უფრო მეტი და მარტივი წვდომა, ასევე მომხმარებელთა უფლებების დაცვა.
„ორი მუდმივი ამოცანა, გამოწვევა გვაქვს: ფასების სტაბილურობის დონის მიღწევა და ფინანსური სექტორის სტაბილურობა - ჩვენი საფინანსო სექტორი, ბევრი საერთაშორისო ორგანიზაციის შეფასებით, მდგრადია, რისკების თვალსაზრისით საკმაოდ დაცულია და მზად არის, გაუძლოს ყველა პოტენციურ, სერიოზულ გამოწვევას.
ზოგადად, ჩვენი მანდატიდან გამომდინარე ორი მუდმივი ამოცანა, გამოწვევა გვაქვს. ეს არის ფასების სტაბილურობის დონის მიღწევა და ფინანსური სექტორის სტაბილურობა, სადაც საკმაოდ კარგი ვითარებაა. ჩვენი საფინანსო სექტორი, ბევრი საერთაშორისო ორგანიზაციის შეფასებით, მდგრადია, რისკების თვალსაზრისით საკმაოდ დაცული და მზად არის გაუძლოს ყველა პოტენციურ, სერიოზულ გამოწვევას, თუმცა თუ უფრო ტაქტიკურ ამოცანებზე ვისაუბრებთ - მოგეხსენებათ, საქართველო ვითარდება როგორც ეკონომიკური ჰაბი და ასევე, უნდა განვითარდეს როგორც ფინანსური ჰაბი, რადგან მზარდ ეკონომიკას მზარდი ფინანსები სჭირდება. შესაბამისად, ჩვენი ამოცანა იქნება საფინანსო სექტორის უფრო მეტი განვითარება, ახალი ტექნოლოგიების, ახალი მოთამაშეების გაჩენა, იქნება ეს ციფრული ბანკები, მიკრო ბანკები; ძალიან საინტერესო ახალი ჩარჩო, რასაც საფინანსო ბაზრის პოტენციურ მონაწილეებს ვთავაზობთ; ასევე კაპიტალის განვითარება თუ სხვა. ანუ - უფრო მეტი, უფრო მარტივი წვდომა ფინანსებზე მოსახლეობასა და ბიზნესს - ეს არის პირველი. ამ კონტექსტში განვიხილავთ კონკურენციის ხელშეწყობასაც საფინანსო ბაზარზე. მეორე კი, ასევე მნიშვნელოვანი და მუდმივი საზრუნავი, ეს არის მომხმარებელთა უფლებების დაცვა. ამ კუთხითაც გვაქვს და გვექნება ბევრი სიახლე, რათა მომხმარებლის პირადი ინფორმაცია და ინტერესები უფრო მეტად იყოს დაცული“, - განაცხადა ნათია თურნავამ.
