უძრავი ქონების ბაზარზე ფასების შეკავება ხელოვნურად ხდება. ბაზარზე რეალურად გასაყიდი ბინების სიჭარბეა, ხოლო მოთხოვნა - ნაკლები, მაგრამ ტენდენცია ღირებულებაზე ჯერჯერობით არ აისახა. ერთ-ერთი ვერსიით, რაზეც ეკონომისტები საუბრობენ, დეველოპერები სპეციალურად ცდილობენ ფასის შენარჩუნებას, ხოლო თუკი ტარიფები კლების მიმართულებით არ დაკორექტირდა, ამან სამშენებლო ბაზარზე შეიძლება პრობლემა და შემდეგ კი კრიზისი წარმოშვას.
ბოლო თვეების პოლიტიკურმა დაძაბულობამ ვითარებაზე გარკვეულწილად იმოქმედა, რადგან ბინების შეძენისგან ყველა მაქსიმალურად იკავებს თავს და მოვლენებს აკვირდება. არჩევნებამდე კი მოთხოვნაც და ფასებიც ზედმეტად იყო გაზრდილი. ბოლო დროს რეალიზაციამ საგრძნობლად იკლო, თუმცა ფასის მხრივ მდგომარეობა ჯერჯერობით უცვლელია.
გარდა ამისა, როგორც დარგის სპეციალისტები განმარტავენ, მოთხოვნის კლებასთან ერთად, ბიზნესმ აქტივობა შეამცირა და მსხვილი პროექტების განხორციელება დროებით შეაჩერეს.
ყოფილი დეპუტატმა და ბიზნესკონსულტატმა ლევან კობერიძემ პირდაპირ განაცხადა, რომ ბინებზე მოთხოვნა კიდევ უფრო შემცირდება, უბრალოდ, პიარ-ტექნოლოგიური დეველოპერები ცდილობენ არსებული მაღალი ფასი შენარჩუნდეს, რაც არარეალურია.
,,მგონია, რომ დღეს უძრავი ქონების ბაზარზე ფასები ხელოვნურად არის გაბერილი. რეალურად ეს არ არის ის მდგომარეობა, რაც მომხმარებელს უნდა ემსახურებოდეს. დღევანდელი ფასი ჩვენი მოქალაქეებისთვის მიუწვდომელია, სამშენებლო სფერო კი საქართველოს მოსახლეობის რეალურ ინტერესებს აცდენილია. ფაქტობრივად დაკავებული არიან პიარით, რომ ფასები არ დაიწევს, რათა მოლოდინი არ შეიქმნას საზოგადოებაში. შესაბამისად, ცდილობენ განწყობის შექმნას, რომ არ შემცირდება და ვისაც ყიდვა სურს, მოუწოდებენ, დროულად გააკეთონ არჩევანი და უკეთეს პირობებს არ დაელოდოს.
ფაქტს, რომ მოთხოვნა შემცირებულია, ადასტურებს ისიც, რომ თვითონ სამშენებლო კომპანიები ბანკების გვერდის ავლით ცდილობენ გარკვეული წინადადების შეთავაზებას მომხმარებლსითვის, როგორიცაა ე.წ. შიდა განვადებები და სხვა.
რაც შეეხება პოლიტიკურ სიტუაციას, ნებისმიერი ასეთი მდგომარეობის დაძაბვა, რა თქმა უნდა, განწყობაზე ნეგატიურად მოქმედებს. ჩვენ მოთხოვნის რეალური კლება გვაქვს, თორემ გაურკვევლობა ბაზარზე სასიკეთოდ აისახება ხოლმე, რადგან ამ დროს ცდილობენ თანხის ინვესტირებას უძრავ ქონებაში. ამჟამად კი ხელოვნურად გაზრდილი ფასები დიდი დაბრკოლებაა.
ჩემი ინფორმაციით, კომპანიები ასეულობით პროცენტიან მოგებაზე მუშაობენ. ურჩევნიათ, მიზანმიმართული ქმედებები განახორციელონ, რათა მერე არგუმენტად მოიშველიონ და შეძლონ საზოგადოების დარწმუნება, რომ ფასი არ შემცირდება“, - განაცხადა ლევან კობერიძემ და ყურადღება გაამახვილა სოციალურ პრობლემაზე, რომელიც ბოლო წლებში გაუარესებულია სწორედ იმის გამოც, რომ ახალგაზრდებს ბინების შეძენაზე ხელი არ მიუწვდებათ და იპოთეკური სესხის გარეშე ყიდვას ვერ ახერხებენ.
,,მოსახლეობის საშუალო ფენა, ახალგაზრდა ოჯახები, რომლებიც პატიოსნად შრომობენ, საკუთარი შემოსავლით ბინას ვერ ყიდულობენ. იპოთეკური სესხი მთელი 10-15 წელი უნდა იხადონ, როცა შესაძლებელია ეს თანხა განვითარებას და განათლების მიღებას მოახმარონ. დეველოპერებს არგუმენტად ხშირად მოჰყავთ გარემოება, რომ საქარტველოში უძრავი ქონება შედარებით ნაკლები ღირს, ვიდრე სხვა ქვეყნებში, მათ შორის, აზერბაიჯანში. კეთილი ინებონ და ცხოვრების დონის ხარისხიც შეაფასონ.
დღეს რა ვითარებაცაა, ასეთი მიდგომით შეიძლება უძრავი ქონების ბაზარზე კრიზისული სიტუაცია შეიქმნას. დეველოპერები ცდილობენ, რომ ბინებზე მაღალი ფასი ხელოვნურად შეინარჩუნონ, რაც ძალიან ცუდი პროცესია და შეიძლება, სექტორის ჩამოშლა გამოიწვიოს“, - აღნიშნა დასძინა ლევან კობერიძემ.
ეკონომისტებნის ნაწილს საპირისპირო მოსაზრება აქვს. მართალია, ისინი ადასტურებენ, რომ მოთხოვნა შემცირებულია, მაგრამ საუბრობენ იმაზეც, რომ ჯერჯერობით ბაზარზე არ არის ის მოცემულობა, რასაც შეიძლება ფასების კლება გამოეწვია. ასე ფიქრობს ახალგაზრდა ფინანსისტთა და ბიზნესმენთა ასოციაციის ვიცე-პრეზიდენტი გიორგი კაპანაძე, რომლის შეფასებითაც, უძრავი ქონების ბაზარზე საფრთხის ნიშნები ჯერჯერობით არ იკვეთება.
,,რა ინფორმაციასაც ამ ეტაპზე ვფლობ, ვფიქრობ, ხელოვნური ფასების შენარჩუნებასთან საქმე ჯერჯერობით არ უნდა გვქონდეს. დეველოპერული კომპანიები, აცხადებენ, რომ 2024 წელს, როცა სრულდებოდა კორპუსების მშენებლობა, 100% წინასწარ იყო გაყიდული. წელს ეს მაჩვენებელი 80%-ს შეადგენს. მოთხოვნა შემცირებულია, მაგრამ რეალურად ბინები გაყიდულია. 2026 წელს დასასრულებელი მშენებლობების შემთხვევაში ეს მაჩვენებელი 50%-ს შეადგენს. აქედან გამომდინარე, ფასების ხელოვნურ შენარჩუნებასთან დაკავშირებით პოზიციას ვერ გავიზიარებ, თუმცა მოთხოვნა შემცირებულია. ამაზე გავლენა, ერთი მხრივ, მიგრანტების ფაქტორმაც იქონია. ხალხი საინვესტიციოდ ბინას აღარ ყიდულობს, შესაბამისად, მოთხოვნა მცირდება.
ამასთან, თბილისში აღარ არის ბევრი მიწის ნაკვეთი, სადაც კორპუსი აშენდება, გადავსებულია, გაჯერებულია დედაქალაქი. რეალურად არ არის იმდენი უძრავი ქონება, რომ სიჭარბე გამოიწვიოს. ამიტომ უძრავი ქონების ბაზარზე საფრთხის ნიშნებს ვერ ვხედავ“ ,- განაცხადა კაპანაძემ.
„თიბისი კაპიტალის“ თბილისის საცხოვრებელი უძრავი ქონების ყოველთვიურ მიმოხილვაში აღნიშნულია, რომ 2025 წლის თებერვალში თბილისში 3185 ტრანზაქცია განხორციელდა, რაც 2024 წლის თებერვლის მაჩვენებელთან შედარებით 5%-ით ნაკლებია . საშუალო გასაყიდმა ფასმა 1კვ. მ-ზე 1222 დოლარი შეადგინა და წლიურად 1%-ით გაიზარდა.
„გასაქირავებელი ფასი 1 კვ. მ-ზე 10.6 დოლარამდე ჩამოვიდა, რაც 2024 წლის იმავე პერიოდის მაჩვენებელზე 12%-ით ნაკლებია.
ბაზრის მოცულობამ 253 მილიონი დოლარი შეადგინა და წლიურად 6%-ით შემცირდა“, - აღნიშნულია ,,თიბისი კაპიტალის“ კვლევაში.
წყარო: რეზონანსი
