საქართველოს კონკურენციისა და მომხმარებლის დაცვის სააგენტომ (GCCA) ,,ვოლტ ჯორჯიას“ უსამართლო კომერციული საქმიანობის ფაქტი დაუდგინდა. GCCA-ის მომხმარებლის უფლებების დაცვის დეპარტამენტის წარმომადგენლის, ქეთა ჭუმბურიძის ინფორმაციით, საკურიერო კომპანიას მომხმარებლები შეცდომაში შეჰყავს „პრემიუმ პაკეტის“ პირობებთან მიმართებით, კერძოდ, კომპანია ამ პაკეტს არეკლამებს როგორც „უფასო მიტანის სერვისი“, თუმცა, როგორც აღმოჩნდა, შეკვეთის განხორციელებისას მომხმარებელს მაინც უწევს გარკვეული ოდენობის თანხის გადახდა.
„მომხმარებლის უფლებების დაცვის კანონმა რომ ეფექტიანად იფუნქციონიროს, მნიშვნელოვანია, მომხმარებლებმა თავიანთი უფლებები იცოდნენ. ცოტა ხნის წინ GCCA-მა ძალიან მნიშვნელოვანი და პრეცედენტული გადაწყვეტილება მიიღო, რომელიც „ვოლტ ჯორჯიას“ მიერ უსამართლო კომერციული საქმიანობის განხორციელებას შეეხებოდა, კერძოდ კომპანიის „პრემიუმ პაკეტს“. როდესაც მომხმარებელი ამ სერვისს ყიდულობს, „ვოლტი“ ძირითად აქცენტს მიტანის უფასო სერვისზე აკეთებს. კონკურენციის სააგენტომ აღმოაჩინა, რომ მომხმარებელი, როცა ამ სერვისს იწერს, მას გარკვეული საფასო კომპონენტის გადახდა მაინც უწევს. აღნიშნული საფასური კლასიფიცირებულია, როგორც მომსახურების საფასური, რაც შეცდომაში შემყვანი კომერციული საქმიანობაა. მაგალითად, თუ მომხმარებელი შეუკვეთს პიცას, რომელიც 30 ლარი ღირს და დაპირებულია უფასო საკურიერო მომსახურება, მას ამ შეკვეთის მისაღებად მხოლოდ ოცდაათი ლარის გადახდა უნდა უწევდეს. საქმის წარმოების დროს, სააგენტო ევროპულ სტანდარტს დაეყრდნო, რაც მომხმარებლისთვის ინფორმაციის თვალსაჩინოების მაღალი სტანდარტით მიწოდებას გულისხმობს, თუმცა ეს არ ნიშნავს ინფორმაციის მოვალეობის მოხდით მიწოდებას, მაგალითად, პატარა შრიფტით ან მრავალგვერდიან PDF ფაილში გაფანტულად მიწოდება არ შეიძლება ჩაითვალოს ინფორმაციის სათანადო ფორმით მიწოდებად. მოვაჭრე უნდა დარწმუნდეს, რომ ინფორმაცია მიწოდებულია მომხმარებლისთვის აღქმადი ფორმით.
მომხმარებლებს არ აქვთ იმის საშუალება, რომ დღის განმავლობაში განხორციელებულ ყველა ტრანზაქციის ფინანსური და ლოგიკური ანალიზი განახორციელონ, შესაბამისად, მომხმარებელი წარმოადგენს ურთიერთობის სუსტ მხარეს. აქედან გამომდინარე, მხარეთა შორის ეს დისბალანსი ინფორმაციის მკაფიო და თვალსაჩინო მიწოდების გზით უნდა აღმოიფხვრას“,- აღნიშნა ქეთა ჭუმბურიძემ რადიო „კომერსანტის“ ეთერში.
მისივე თქმით, GCCA-ს გაფრთხილების შემდეგ, თუ "ვოლტი" ხარვეზს არ გამოასწორებს, მას ფინანსური სანქცია დაემუქრება.
ქეთა ჭუმბურიძის ინფორმაციით, რომ გასულ წელთან შედარებით, 2025 წლის პირველ კვარტალში სააგენტოს 40%-ით მეტმა მომხმარებელმა მიმართა, საჩივრები ძირითადად ონლაინვაჭრობაზე მოდის.
„ვოლტის“ შემთხვევაში კომპანიას შეცდომაში შემყვანი ეფექტის გამოსასწორებლად 1-თვიანი ვადა მიეცა. უპირველესად, „ვოლტ ჯორჯია“ ვალდებულია, მომხმარებელს თვალსაჩინოდ მიაწოდოს ინფორმაცია, რომ „პრემიუმის“ ყიდვის შემთხვევაშიც კი, სხვა საფასო კომპონენტი იარსებებს. „ვოლტს“ ვალდებულების შესრულება ჯერ არ დაუწყია.
სტანდარტულად, თუ მოვაჭრე ხარვეზებს არ აღმოფხვრის, 1 თვიანი გამოსასწორებელი ვადის გასვლის შემდეგ, ფინანსური სანქციების ჯერი დგება. ფინანსური სანქცია მაქსიმალური ოდენობით, მთელი წლის ბრუნვის 2%-ია, ხოლო მინიმალური ოდენობა- 600 ლარი.
რაც შეეხება მომართვიანობას, 2025 წელს ძალიან გაზრდილია: შემოსულია 319 განაცხადი, ცხელ ხაზზე დაფიქსირებულია 1000-მდე ზარი, რაც წინა წლის ანალოგიურ მაჩვენებელთან შედარებით, 40%-იანი ზრდაა.
შემოსული განცხადებების ძირითადი ნაწილი, როგორც გასულ წელს, ონლაინვაჭრობას შეეხება“,- აღნიშნა GCCA-ის მომხმარებლის უფლებების დაცვის დეპარტამენტის წარმომადგენელმა, ქეთა ჭუმბურიძემ.
