ეკონომისტებისა და სამშენებლო სფეროს წარმომადგენლების ნაწილის თქმით, რუსეთ-უკრაინის ომის და მიგრანტების ტალღის შენელების შემდეგ, უძრავი ქონების ბაზარზე მოთხოვნა იკლებს, შემცირებულია საბანკო სექტორის მხრიდან ახალი პროექტების დაფინანსებაც.
„არსის“ აღმასრულებელი დირექტორის, ბესო ორთოიძის შეფასებით კი, მოთხოვნის შემცირება დეკემბერში პროგნოზირებულ რიცხვს არ გაუტოლდა და ამ ეტაპზე, ბაზარი აღდგენის პროცესშია.
იმას რომ დარგში კრიზისი არ არის, სამშენებლო სფეროს წარმომადგენელი „კომერსანტთან“ რამდენიმე არგუმენტით ამყარებს, რომელთა შორის თებერვალსა და მარტში უძრავ ქონებაზე გაზრდილი მოთხოვნაა. ბესო ორთოიძე ამბობს იმასაც, რომ მათი პროექტების უმრავლესობას, ქართველები ყიდულობენ.
რაც შეეხება ფასებს, ორთოიძე ფასების დრამატულ კლებას გამორიცხავს.
„შეიძლება ითქვას, რომ ბინებზე მოთხოვნა დასტაბილურდა. იანვარ-დეკემბერში მოთხოვნა შედარებით შემცირებული იყო, თებერვალ-მარტში კი საკმაოდ ნორმალური სიტუაციაა. ის მოლოდინები, რაც წლის ბოლოს გვქონდა, რომ უძრავი ქონების ბაზარზე მკვეთრი რყევები უნდა გვქონოდა, არ გამართლდა და დრამატული შემცირება ამ ეტაპზე არ გვაქვს. კლება არის, მაგრამ არა ისეთი მნიშვნელოვანი, რომ პრობლემები წარმოშვას. უნდა აღინიშნოს, რომ გარკვეული დაკვირვება მაინც საჭიროა, რათა განისაზღვროს, ეს სტაბილური მოთხოვნაა, თუ იმის ხარჯზეა, რა შემცირებაც გასულ თვეებში იყო. ამას ჩვენს სფეროში „დაგროვებული მოთხოვნა“ ჰქვია, ანუ როცა ბაზარზე მოთხოვნა ჩავარდება და მერე ტრანზაქციები ერთიანად ისახება. დღეს შეიძლება ითქვას, რომ უძრავი ქონების ბაზარზე რამე დრამატული ცვლილება, რომელმაც შესაძლოა კრიზისი გამოიწვიოს, არ გვაქვს.
ხშირად ისმის, რომ მოთხოვნა ფასებს პირდაპირ უკავშირდება, მაგრამ ასე არაა - მოთხოვნის შემცირების ხარჯზე კომპანიები თუ ფასებს დასწევენ, აქ სხვა რისკები წარმოიშობა. მეორად ბაზარზე ფასების შემცირება გასაგებია, თუმცა პირველად ბაზარზე ფასების შემცირება უფრო პრობლემის მომასწავებელია, ვიდრე გამოსავალი.
ჩვენ რა პროდუქტიც გვაქვს, მომხმარებელი 99%-ში ქართველია და ნაკლებად არარეზიდენტები“,- აღნიშნა ბესო ორთოიძემ.
