შპს „ომეგა მოტორსი“ ამჟამად გაკოტრების რეჟიმშია. 

აღსრულების ეროვნული ბიურო შპს „ომეგა მოტორსის“ საკუთრებაში არსებული არამატერიალური აქტივის შპს „ტელე-რადიო კომპანია ქართლის“ 25%-იან წილს და 513 273 ლარის ქონებას ყიდის.

სარეალიზაციო ქონება წარმოადგენს შემდეგს: 1) ავტომობილის შეკეთებისთვის საჭირო ნაწილები და აქსესუარები; 2) მოძრავი ქონება ავტომობილების სახით; 3) არამატერიალური აქტივები და დებიტორული მოთხოვნები; 4) ძირითადი საშუალებები; 5) სხვადასხვა დასახლებების მოძრავი ქონებები; 6) საბურავები.

აუქციონი 31 მაისს გაიმართება.

1999 წელს დაფუძნებული „ომეგა მოტორსის” 100%-იანი წილი პანამურ ოფშორში რეგისტრირებულ FRYSIAN ENGINEERING S.A-ს ეკუთვნის.  კომპანიის დირექტორი ამჟამად ლელა აბულაძეა. „ომეგა მოტორსი” საქართველოში BMW-ს, MINI-ს, Bentley-ის, Land Rover-ის Maseratი-ის და სხვა ბრენდების ავტომობილების დილერი იყო.

„ომეგა ჯგუფს“ პრობლემები 2018 წლიდან დაეწყო, მას შემდეგ რაც კომპანიის მფლობელმა ზაზა ოქუაშვილმა „ქართული ოცნების“ მაშინდელ თავმჯდომარე ბიძინა ივანიშვილი და შინაგან საქმეთა იმდროინდელი მინისტრი გიორგი გახარია 4 მილიონი დოლარის გამოძალვაში დაადანაშაულა.

პრობლემებზე ზაზა ოქრუაშვილი რამდენიმე თვის წინაც საუბრობდა და აცხადებდა, რომ „ივანიშვილი ხელისუფლების კლანის მიერ მართული სასამართლოს მეშვეობით ცდილობს ,,ომეგა ჯგუფის"  საკუთრების მიტაცებას“. 

„როგორც დიდი ბრიტანეთის მოქალაქე საქართველოს ფარგლებს გარეთ ვაგრძელებ სამართლებრივ ბრძოლას ჩემი, როგორც ინვესტორის დარღვეული უფლებების აღსადგენად საქართველოს მთავრობის, ბიძინა ივანიშვილის და სხვა კონკრეტული პირების წინააღმდეგ. ეს ბრძოლა სამომავლოდ ასევე მიმართული იქნება საკუთრების უფლების უგულვებელყოფის თითოეულ გამოვლენასთან დაკავშირებით. ვაფრთხილებ, საკუთრების უხეში ხელყოფის გზით წართმეული ომეგა ჯგუფის სხვადასხვა ქონების (მათ შორის, დავით აღმაშენებლის ხეივანზე მდებარე, “ომეგა მოტორ ჯგუფის” შოურუმები, რომლებიც განკუთვნილი იყო ბენტლის, ბეემვე-მინის და მაზერატის, ასევე “მთავარი არხის” სტუდიების ფუნქციონირებისთვის) პოტენციურ შემძენებს, რომ ისინი არ ჩაითვლებიან კეთილსინდისიერ მყიდველებად და ავტომატურად გახდებიან იმ უკანონო კონსპირაციის მონაწილე, რასაც ბოლო წლების მანძილზე ახორციელებს ივანიშვილი ჩემი, როგორც ომეგა ჯგუფისა და მთავარი არხის დამფუძნებლის წინააღმდეგ“ - აცხადებდა 5 თვის წინ ზაზა ოქუაშვილი.