რუსული და ჩინური სამთავრობო მედიის ინფორმაციით, რუსეთის პრეზიდენტი ვლადიმირ პუტინი 31 აგვისტოს ჩინეთის საპორტო ქალაქ ტიანძინში ჩავიდა რეგიონული უსაფრთხოების სამიტზე დასასწრებად.
ვიზიტის ფარგლებში პუტინი ჩინეთში ოთხ დღეს გაატარებს. TASS-ის მიერ გავრცელებული პირდაპირი ეთერის მიხედვით, ქალაქში ჩასულ რუსეთის პრეზიდენტს წითელი ხალიჩით დახვდნენ და ქალაქის მაღალჩინოსნები შეეგებნენ.
პუტინის ჩასვლასთან დაკავშირებით გადაცემაში ჩინეთის სამთავრობო ტელევიზიაში, CCTV-ში თქვეს, რომ ჩინეთსა და რუსეთს შორის კავშირები "ისტორიაში საუკეთესოა", და ბოლო პერიოდში "ყველაზე სტაბილური, მომწიფებული და სტრატეგიულად მნიშვნელოვანი გახდა დიდ ქვეყნებს შორის".
ცნობისთვის, ჩინეთის პრეზიდენტი სი ძინფინგი ტიანძინში, შანხაის თანამშრომლობის ორგანიზაციის სამიტზე, მსოფლიოს 20-მდე ლიდერს უმასპინძლებს, მათ შორის ინდოეთის პრემიერმინისტრ ნარენდრა მოდისაც.
ვიზიტამდე ერთი დღით ადრე პუტინმა ჩინეთის სახელმწიფო მედიასთან, Xinhua-სთან წერილობით ინტერვიუში დასავლეთის სანქციები გააკრიტიკა და განაცხადა, რომ მოსკოვი და პეკინი ერთობლივად ეწინააღმდეგებიან "დისკრიმინაციულ" სანქციებს მსოფლიო ვაჭრობაში.
სამიტზე ასევე ჩავლენ ცენტრალური აზიის, ახლო აღმოსავლეთის, სამხრეთ აზიისა და სამხრეთ-აღმოსავლეთ აზიის ქვეყნების ლიდერები და, როგორც Reuters წერს, ჩინეთის მიზანი "გლობალური სამხრეთის" სახელმწიფოებს შორის ერთიანობის წარმოჩენა იქნება.
