ახალმა კვლევამ აჩვენა, რომ ავიაკომპანიები ყოველწლიურად მილიონობით დოლარს გამოიმუშავებენ ფასიანი სერვისებით, რომლებიც მგზავრებს ერთმანეთის გვერდით ადგილების არჩევის საშუალებას აძლევს. ამასთან, ახლობლებისგან განცალკევება მგზავრებისთვის სტრესული აღმოჩნდა.
კომპანია Radical Storage-ის მიერ 2025 წლის ივნისში დიდ ბრიტანეთში 1050 ზრდასრულ ადამიანზე ჩატარებული გამოკითხვის თანახმად, რესპონდენტების 61.3%-მა დამატებითი თანხა გადაიხადა, რათა ნათესავების ან მეგობრების გვერდით დამჯდარიყო. საშუალოდ, დიდ ბრიტანეთში მცირეწლოვანი ბავშვების მქონე ოჯახები ამ სერვისზე წელიწადში დაახლოებით 30.5 მილიონ დოლარს ხარჯავენ.
ყველაზე მაღალი გადასახადები შემდეგ ავიაკომპანიებში დაფიქსირდა:
Virgin Atlantic – 40.6 დოლარი თითო მგზავრზე.
Etihad Airways – 32.5 დოლარი თითო მგზავრზე.
TUI Airways – 162.5 დოლარამდე ოჯახისთვის.
easyJet – მინიმალური გადასახადი 2.7 დოლარი თითო მგზავრზე.
გამოკითხვის მიხედვით, მგზავრების თითქმის ნახევარი (48.9%) ასეთ პრაქტიკას მიუღებლად მიიჩნევს, ხოლო 91.8% მზად იქნებოდა, ადგილი დაეთმო ოჯახის წევრებისთვის. ასევე, რესპონდენტების 35%-მა აღიარა, რომ ახლობლებისგან განცალკევებით ჯდომა მათთვის „ძალიან სტრესულია“.
ექსპერტების განცხადებით, ამ საკითხთან დაკავშირებით ცვლილებები მოსალოდნელია.
აშშ-ის პრეზიდენტ ჯო ბაიდენის ადმინისტრაციამ 2024 წელს ავიაკომპანიებისთვის ოჯახების გვერდიგვერდ დასმისთვის საფასურის დაწესება აკრძალა.
ევროკავშირმა 2025 წლის ივნისში მსგავსი აკრძალვის შემოღებას დაუჭირა მხარი, რაც 12 წლამდე ასაკის ბავშვებს შეეხება.
ამასთან, დიდი ბრიტანეთის სამოქალაქო ავიაციის სამსახური (CAA) ოჯახების ერთად დასმას უსაფრთხოების თვალსაზრისითაც განიხილავს. საგანგებო სიტუაციის შემთხვევაში, განცალკევებულმა მგზავრებმა შესაძლოა ხელი შეუშალონ ევაკუაციას, რადგან ისინი ოჯახის წევრების მოძებნას შეეცდებიან.
