ასტრონომებმა მზის ზედაპირის ყველაზე დეტალური სურათები მიიღეს, რომლებზეც მბრუნავი მორევები და ოქროსფერი ზოლები ჩანს. დაკვირვებები ჰავაიზე მდებარე ინოუეს მზის ტელესკოპის გამოყენებით განხორციელდა, რომელიც მსოფლიოში ყველაზე ძლიერად ითვლება, - წერს The Guardian.
სურათებზე მზის ლაქის მახლობლად მაგნიტურად აქტიურ ზონაში 20 კმ-ზე პატარა ობიექტები გამოვლინდა. ეს სურათები ავლენს პროცესებს, რომლებმაც შეიძლება ახსნას დიდი ხნის საიდუმლო: რატომ თბება მზის გვირგვინი, მისი გარე ატმოსფერო, მილიონობით გრადუსამდე, მაშინ როცა მისი ზედაპირი მხოლოდ 6000 გრადუსია.
აშშ-ის ეროვნული მზის ობსერვატორიის უფროსი მეცნიერის, დოქტორ ფრიდრიხ ვოეგერის თქმით, ეს არის „მზის ზედაპირის ყველაზე მაღალი სივრცითი გარჩევადობის სურათები, რაც კი ოდესმე მიღებულა“. სურათებში, პატარა მორევების მსგავსი სტრუქტურები კელვინ-ჰელმჰოლცის არასტაბილურობის (KHIs) სახით იქნა იდენტიფიცირებული. ისინი წარმოიქმნება მაშინ, როდესაც სწრაფად მოძრავი პლაზმა სრიალებს უფრო ნელა მოძრავ სითხესთან, რაც ქმნის ძვრის ნიშანს საზღვარზე. ეს იწვევს დარღვევებს, რომლებიც სპირალურ მორევებად გადაიქცევა და ტალღების გარღვევას წააგავს.
მეცნიერებმა KHIs -ებს დააკვირდნენ ტბებში, ოკეანეებში, დედამიწის ღრუბლებში და იუპიტერისა და სატურნის ატმოსფეროშიც კი, თუმცა ეს პირველი შემთხვევაა, როდესაც მათი არსებობა მზეზე დადასტურდა.
