ქართულმა საცალო ქსელმა „დეილიმ“ საქართველოს ფარგლებს გარეთ პირველი სუპერმარკეტი უზბეკეთში, ტაშკენტში გახსნა.
საქართველოს FMCG სექტორში ერთ-ერთი წამყვანი კომპანია, წამყვანი ქვეყნის მასშტაბით 1 700-მდე მაღაზიას მართავს და ყოველდღიურად 650,000 მომხმარებელს ემსახურება. „დეილის“ სავაჭრო ჯგუფში შედის შვილობილი კომპანია „ქართული ლუდის კომპანია“, რომელიც ლუდისა და უალკოჰოლო სასმელების კატეგორიებში ისეთ ბრენდებს აერთიანებს, როგორებიცაა „ზედაზენი“, „RS კოლა“, „მილერი“ და სხვა.
უზბეკეთის ბაზარზე ქართული კომპანია 2024 წლის დეკემბრიდან, მას შემდეგ შევიდა, რაც "დეილი ჯგუფმა" ფრანგული Schiever Group-ისგან Bi1-ის მაღაზიათა ქსელის საკონტროლო პაკეტი შეიძინა.
31 მარტს გახსნილი სუპერმარკეტი კი ამ ქსელის რიგით 34-ე ობიექტია ტაშკენტში.
„2025 წლის 31 მარტს, უზბეკეთის დედაქალაქ ტაშკენტში გაიხსნა „დეილის“ პირველი სუპერმარკეტი, რაც მნიშვნელოვანი ეტაპია როგორც კომპანიის განვითარების, ისე საქართველოს საცალო ვაჭრობის სექტორის გლობალიზაციის გზაზე.
„დეილი“ გახდა ერთ-ერთი პირველი ქართული რითეილ ბრენდი, რომელმაც ოპერირება ქვეყნის ფარგლებს გარეთ დაიწყო და ქართული წარმოების პროდუქციისთვის უზბეკეთის ბაზარზე გასვლის ახალი შესაძლებლობა შექმნა.
დეილის“ გაფართოება უზბეკეთის ბაზარზე წარმოადგენს ქართულ რითეილ სექტორში საერთაშორისო ბაზრებზე გასვლის თვალსაჩინო პრეცედენტს და დამატებით შესაძლებლობებს უხსნის ქართული პროდუქციის მწარმოებლებს გარე ბაზრებზე ექსპანსიისთვის“,- აცხადებენ „დეილის“ წარმომადგენლები.
