დაზღვევის სახელმწიფო ზედამხედველობის სამსახურში შესული საჩივრების დიდი ნაწილი უწყების დონეზე გვარდება, სასამართლომდე კი მათი მხოლოდ 1% მიდის.
ამის შესახებ დაზღვევის სახელმწიფო ზედამხედველობის სამსახურის ხელმძღვანელმა დავით ონოფრიშვილმა გადაცემაში „ბიზნესი რუსთავი 2“- ზე საუბრისას განაცხადა.
მისი თქმით, გაუგებრობების თავიდან აცილებისთვის აუცილებელია, მომხმარებლებმა ხელშეკრულება მის ხელმოწერამდე წაიკითხონ, განსაკუთრებული ყურადღება კი გამონაკლისებს მიაქციონ.
რაც შეეხება გასაჩივრების მექანიზმს, ონოფრიშვილის თქმით, მაგალითად თუ დაზღვეულს არ აკმაყოფილებს ასანაზღაურებელი თანხაა ან არ ეთანხმება კომპანიის სხვა რომელიმე პირობას, პირველ რიგში თავად სადაზღვევო კომპანიას უნდა მიმართოს, რომელსაც კანონი ავალდებულებს, ჰქონდეს მომხმარებელთა უფლებების დაცვის ერთეული. თუ კომპანიის გადაწყვეტილება არ დააკმაყოფილებს, შემდეგ ეტაპზე შეუძლია უკვე საზედამხედველო უწყებას მიმართოს, სადაც მომხმარებელთა უფლებების დაცვის სამსახური მოქმედებს.
„ამ შემთხვევაში გვაქვს ულება, მომხმარებლის სახელით გამოვითხოვოთ მთელი ინფორმაცია სადაზღვევო კომპანიისგან, თუ რატომ შეიქმნა საკამათო საკითხი. ჩვენი თანამშრომლები არიან იურისტები, ისინი მუშაობდნენ სადაზღვევო კომპანიებში და საქმეს კომპეტენტურად განიხილავენ. მესამე დონეა სასამართლო, თუმცა შემოსული წერილებიდან სასამართლოში შეიძლება განცხადებების 1% წავიდეს. 50%-ზე მეტია ისეთი შემთხვევა, როცა მომხმარებლს მხარეს ვიჭერთ და კომპანიები მოდიან გარკვეულ ნაბიჯებზე,“ - განაცხადა დავით ონოფრიშვილმა.
მისი თქმით, პრობლემაა ის, რომ მომხმარებლებმა ხშირად არ იციან ხელშეკრულების პირობები. ამიტომ, ონოფრიშვილი ურჩევს დაზღვეულებს, პაკეტის შეძენისას გაეცნონ გამონაკლისის პირობებს, სადაც წერია, რა შემთხვევაში არ მოქმდებს დაზღვევა. მას მოჰყავს სამოგზაურო დაზღვევის მაგალითი, რომელიც ქრონიკული დაავადებების გამწვავებას არ ფარავს და მხოლოდ ურგენტულ შემთხვევებს მოიცავს - მაგალითად, თუ ადამიანისთვის სასწრაფო დახმარება გახდა გამოსაძახებელი, ფეხი მოტყდა და ა.შ.
„ამიტომ კომპანიებსაც ვეუბნებით, რომ განსაკუთრებული ყურადღება მიაქციონ გამონაკლისებს და აუხსნან მომხმარებლებს გამონაკლისების პირობები,“ - აღნიშნა დავით ონოფრიშვილმა.
