კრიპტოვალუტების ბაზარზე ვარდნა გრძელდება. The Wall Street Journal-ის ინფორმაციით, შაბათ-კვირის მასშტაბურმა გაყიდვებმა კრიპტობაზრის საერთო კაპიტალიზაცია დაახლოებით 217 მილიარდი დოლარით შეამცირა. ბიტკოინის ფასი 64 825 დოლარამდე დაეცა, რითაც 65 000-დოლარიან ფსიქოლოგიურ ნიშნულს ჩამოსცდა. მნიშვნელოვანი კლება დაფიქსირდა Ethereum-ზეც, რომლის ფასი 2 000 დოლარზე დაბლა, დაახლოებით 1 821 დოლარამდე შემცირდა.

ბაზარზე ზეწოლის ერთ-ერთი მთავარი წყარო ინსტიტუციური ინვესტიციების შემცირებაა. აშშ-ში მოქმედი სპოტ-ბიტკოინის საბირჟო ფონდებიდან (ETF) კაპიტალის გადინება გრძელდება. Coinbase Institutional-ის მონაცემებით, 9-13 ნოემბრის პერიოდში აშშ-ის სპოტ-ბიტკოინის ETF-ებიდან წმინდა გადინებამ დაახლოებით 1.065 მილიარდი დოლარი შეადგინა. ეს მიუთითებს, რომ მსხვილი ინვესტორების მხრიდან ბიტკოინზე მოთხოვნა შესუსტებულია.

კრიპტოაქტივების მიმართ ინვესტორების განწყობაზე გავლენას ახდენს მაკროეკონომიკური ფაქტორებიც. აშშ-ის სახაზინო ობლიგაციების შემოსავლიანობის ზრდა და დოლარის გამყარება ამცირებს მაღალი რისკის მქონე აქტივების მიმზიდველობას. ამასთან, მონეტარული პოლიტიკის შესაძლო გამკაცრების მოლოდინი ინვესტორებს უფრო კონსერვატიული საინვესტიციო სტრატეგიისკენ უბიძგებს. ასეთ ვითარებაში ბიტკოინი და სხვა კრიპტოვალუტები განსაკუთრებით მგრძნობიარე ხდება კაპიტალის გადინების მიმართ.

WSJ-ის მიერ გამოკითხული ანალიტიკოსების შეფასებით, ბიტკოინის ფასის დროებითი აღდგენა ჯერ კიდევ არ ნიშნავს, რომ ბაზარმა ვარდნის საბოლოო ნიშნულს მიაღწია. მდგომარეობის გაუმჯობესებისთვის აუცილებელია ETF-ებში კაპიტალის შემოდინების განახლება და აშშ-ის ობლიგაციების შემოსავლიანობაზე ზეწოლის შემცირება. მანამდე კი კრიპტობაზარზე მოკლევადიანი პერსპექტივა კვლავ გაურკვეველია.