ზოგიერთი ექსპერტის განცხადებით, სოციალურ მედიაში მიმდინარე პროპაგანდისტულ ომს ირანი იგებს. ეს დიდწილად Lego-ს თემატიკაზე შექმნილი დამსახურებაა, რომლებიც TikTok-სა და სხვა პლატფორმებზე ვირუსულად ვრცელდება. ტრადიციული მედია ამ ყველაფერს დაგვიანებით აჰყვა და, გაუაზრებლად, კონტენტის კიდევ უფრო ფართო აუდიტორიამდე მიტანას შეუწყო ხელი. მანამდე რიგით მომხმარებლებს, რომლებიც TikTok-სა და ინსტაგრამს მიღმა არიან, ეს ვიდეოები დიდად არც კი ენახათ, რადგან თავად პლატფორმები მათ წაშლას მაქსიმალურად სწრაფად ცდილობდნენ.
თუმცა, ირანული კამპანია იმდენად კარგად კოორდინირებულია, რომ წაშლისთანავე ვიდეოები თავიდან იტვირთება და ზიარდება. ბუნებრივია, კორპორაციული კომუნიკაციების კუთხით ჩნდება მთავარი კითხვა – წარმოადგენს თუ არა ეს სერიოზულ რისკს უშუალოდ Lego-ს ბრენდისთვის? კრიზისის კომუნიკაციის სპეციალისტის, ენდი ბარის მცირე მოკვლევის საფუძველზე შეიძლება ითქვას, რომ ეს საფრთხე უკვე საკმაოდ რეალურია. ამის გადასამოწმებლად ინსტაგრამსა და TikTok-ზე, სადაც მიკრო-ინფლუენსერის სტატუსით საკმაოდ აქტიური აუდიტორია ჰყავს, ენდიმ საკუთარ გამომწერებს ჰკითხა, ენახათ თუ არა Lego-ს გამოყენებით შექმნილი ირანული პროპაგანდისტული ვიდეოები.
სულ რაღაც ნახევარ საათში ასზე მეტი პასუხი მიიღო, სადაც გამოკითხულთა 35%-მა დადებითი პასუხი დააფიქსირა. საინტერესოა ისიც, რომ ინსტაგრამის შედარებით ზრდასრულ აუდიტორიაში უარყოფითი პასუხები ჭარბობდა, ხოლო TikTok-ის ახალგაზრდა მომხმარებლებში ვიდეოს მნახველთა პროცენტული მაჩვენებელი გაცილებით მაღალი იყო. ნებისმიერ შემთხვევაში, 35% უკვე საკმარისად დიდი რიცხვია საიმისოდ, რომ Lego-ს მონიტორინგის გუნდს განგაში აეტეხა, რომელსაც წესით, ბევრად უფრო დახვეწილი საფრთხის აღმომჩენი სისტემები აქვს. თუ გავითვალისწინებთ, რომ ამ თემაზე უკვე ისეთმა მედიაგიგანტებმა დაწერეს, როგორებიცაა Wired, BBC და New York Post, ბრენდის შფოთვა სავსებით ლოგიკურია.
Google-ის ძიების ტენდენციებიც ადასტურებს, რომ პროპაგანდისტულმა კლიპებმა Lego-ს მიმართ ინტერესი ხელოვნურად გაზარდა. 2026 წლის მარტში, როდესაც ვიდეოების გავრცელებამ პიკს მიაღწია (მიუხედავად იმისა, რომ მსგავსი კონტენტი 2024 წლიდან ტრიალებს), ბრენდის ძიების მაჩვენებელი წინა წლების ანალოგიურ პერიოდთან შედარებით 82 %თ იყო გაზრდილი. კრიზისების მართვისა და რეპუტაციის კუთხით, კომპანია ვიზუალური იდენტობის სერიოზული შელახვის წინაშე აღმოჩნდა.
ასეთ დროს ბრენდს ორი აშკარა გზა ჰქონდა: ან სრული იგნორირება მოეხდინა, ან მკაცრი განცხადებით გაემიჯნა თავი ამ ყველაფრისგან. თუმცა, არსებობს მესამე, ბევრად უფრო ჭკვიანური სტრატეგიაც, რომელსაც ახლა Lego მიმართავს – ეს ინტერნეტის საკუთარი, პოზიტიური კონტენტით გადავსებაა.
ენდის ვარაუდს რამდენიმე ფაქტობრივი გარემოება ამყარებს. პირველ რიგში, თუ გადავხედავთ Lego-ს PR მანქანის მუშაობას, 2024 და 2025 წლების საწყის ოთხ თვეში პრესსამსახური თვეში საშუალოდ 17 პრესრელიზს ავრცელებდა. 2026 წლის საწყის თვეებში კი ეს მაჩვენებელი უკვე 31-მდე გაიზარდა და ეს მაშინ, როცა აპრილი ჯერ არც კი დასრულებულა. მეორე ფაქტორი ვიდეოკონტენტს უკავშირდება. ვინაიდან პროპაგანდა სწორედ ვიდეოპლატფორმებზე ვრცელდება, ბრენდმა თავისი YouTube Shorts-ების წარმოება გააორმაგა. მაშინ, როცა ვრცელი ფორმატის ვიდეოების რაოდენობა სტაბილური დარჩა, მოკლე ვიდეოების გამოშვების ტემპმა იმატა. მარტამდე კომპანია თვეში დაახლოებით 44 მოკლე ვიდეოს უშვებდა, მარტში კი ეს რიცხვი 53-მდე აიყვანა. ეს აშკარად ემსახურება იმ მიზანს, რომ ირანული კონტენტის ძიებისას მომხმარებელს რეალური, პოზიტიური ვიდეოები დახვდეს და ბრენდმა საკუთარი ხმა დაიბრუნოს.
მესამე არგუმენტი ოდნავ უფრო ინტუიციურ დაკვირვებას და დაფინანსებულ კონტენტს ეხება. მარტივი გათვლებითა და ვიდეოების ნახვების ანალიზით შემიძლია ვივარაუდო, რომ 2026 წლის მარტამდე Lego თავისი მოკლე ვიდეოებიდან ექვსიდან მხოლოდ ერთს აძლიერებდა ფინანსურად. პროპაგანდისტული კონტენტის პიკის დროს კი, ეს მაჩვენებელი ექვსიდან ოთხამდე გაიზარდა. ენდის აზრით, ეს ყველაზე სწორი და დასაფასებელი მიდგომაა. ოფიციალური განცხადებების კეთება ბრენდის საგულდაგულოდ აშენებულ ეთიკაში არ ჯდება. ამასთან, დიდი ალბათობით, კულისებს მიღმა კომპანია აქტიურად მუშაობს პლატფორმებთან და აშშ-ის მთავრობის მხარდაჭერითაც სარგებლობს, რათა დამაზიანებელი კონტენტი სწრაფად წაიშალოს.
ჯერჯერობით ეს სტრატეგია ნამდვილად ამართლებს და პროპაგანდა ბრენდის მთავარ საძიებო შედეგებში არ იჟონება. თუ რამდენ ხანს გასტანს ეს პოზიტიური მიდგომა და რა შედეგს მოიტანს, რთული სათქმელია, თუმცა წლების შემდეგ ეს ქეისი აუცილებლად გახდება უნივერსიტეტებსა და კრიზისული კომუნიკაციების ტრენინგებზე განხილვის მთავარი საგანი.
წყარო: The Drum, www.marketer.ge
