რუსულმა მხარემ ბოლო 2 დღეში ჯერ განაცხადა, რომ წვრთნების შემდეგ ჯარს მუდმივი დისლოკაციის ადგილებზე აბრუნებდა, შემდეგ დაიმუქრა – შეერთებულმა შტატებმა უსაფრთხოების გარანტიები არ მოგვცა და ამიტომ ჩვენ ვიმოქმედებთ მათ შორის სამხედრო-ტექნიკური ხასიათის გზებითო. პარალელურად უკრაინის საზღვრებთან სამხედროთა რაოდენობა 7000-ით გაზარდა. საფრანგეთისა და გერმანიის პირველი პირების კრემლში პრაქტიკულად უშედეგო ვოიაჟის შემდეგ, ევროპის საბჭომ, გაერომ და შეერთებულმა შტატებმა რეზოლუციები ერთი მეორის მიყოლებით მიიღეს და მოსკოვს შეჩერებისკენ მოუწოდეს, რისი იმედიც თავად ბაიდენს არ აქვს. კიევმა უკვე ევაკუაციის გეგმა დაამტკიცა.
20 თებერვალი კრიტიკულ მომენტს წარმოადგენს. ერთის მხრივ პეკინში ზამთრის ოლიმპიადა სრულდება, მეორეს მხრივ ბელარუსში რუსეთის სამხედროთა წვრთნები. პუტინს რომ ოლიმპიადების მიმართ განსაკუთრებული სიყვარული აქვს, ეს კარგად იციან თბილისშიც და კიევშიც. 2008 წელს რუსული არმია საქართველოში ღიად, სწორედ პეკინის ოლიმპიადის გახსნის დღეს შემოიჭრა, 6 წლის შემდეგ კი ყირიმის ანექსია სოჭის ოლიმპიადას დაამთხვია. მსგავსება ამით არ სრულდება, უკრაინაში საბავშვო ბაღის დაბომბვა რიგით ინციდენტზე მეტია. არ არის გამორიცხული, უახლოეს პერიოდში ლუგანსკში ან დონეცკში რომელიმე საცხოვრებელი კორპუსი აფეთქდეს და ეს „უკრაინელ ტერორისტებს“ დაბრალდეთ. 1999 წლის სექტემბერში ბუინაგსკში, ვოლგოდონსკსა და მოსკოვში ფედერალურის უსაფრთხოების სამსახურის - ФСБ-ს მიერ აფეთქებულ კორპუსებს 307 ადამიანი შეეწირა, 1000-ზე მეტი დაშავდა. რის შემდეგაც რუსეთი იჩქერიის რესპუბლიკაში (ჩეჩნეთში) ხელმეორედ შეიჭრა. ეს მეთოდი პუტინის ნოუ-ჰაუ არ არის, იქამდე 66 წლით ადრე კომუნისტების საბოლოოდ გასანადგურებლად ჰიტლერმაც გადაწვა რაიხსტაგი.
17 თებერვალს, უკრაინას პოლონეთსა და ბრიტანეთს შორის, ახალ სამთა კავშირად წოდებული მემორანდუმი გაფორმდა, თუმცა დოკუმენტი ნატოს მე-5 მუხლის მსგავსად მხარეებს სამხედრო დახმარებას არ ავალდებულებს. შინაარსით მსგავსი ვალდებულება 1994 წელს უკრაინის წინაშე შეერთებულმა შტატებმა, ბრიტანეთმა და რუსეთმა აიღეს, როდესაც კიევს ტერიტორიული უსაფრთხოების გარანტიის სანაცვლოდ ბირთვული შეიარაღება დაათმობინეს. 20 წლის შემდეგ სამიდან ერთი თავად გახდა აგრესორი, დარჩენილი ორი კი სიტყვიერი მხარდაჭერითა და რუსეთის წინააღმდეგ დაწესებული უმნიშვნელო სანქციებით შემოიფარგლა.
2022 წელს დამოკიდებულება შეიცვალა, მაგრამ მხოლოდ მცირედით. უკრაინას იარაღს აწვდიან, მაგრამ პირდაპირ აცხადებენ, რომ ომში არ ჩაერთვებიან, მეტიც არაოფიციალური ცნობებით ომის შემთხვევაში რუსეთს SWIFT-იდანაც კი არ გათიშავენ. ეკონომიკურ ზეწოლას დასჯერდება რუსეთი, „მცირე შეჭრას“ თუ წავა სრულმასშტაბიან ომზე, ამას უახლოესი მომავალი გვიჩვენებს. უკრაინის შემდეგ კი ჯერი შესაძლოა ისევ საქართველოზე დადგეს.
განახლებული 13:10
ამასობაში რუსეთის საჯარისო გაერთიანებებმა და ცალკეულმა ქვედანაყოფებმა, რომლებიც უკრაინის საზღვრებთან არიან განლაგებული, საბრძოლო ამოცანები მიიღეს. ამის შესახებ ინფორმაციას აზერბაიჯანული სააგენტო haqqin.az–ს ჟურნალისტი უკრაინის თავდაცვის უწყებასთან დაახლოებულ წყაროზე დაყრდნობით კიევიდან იუწყება.
სააგენტოს წყარო ამბობს, რომ უკრაინის სამხედრო დაზვერვის მონაცემებით, საბრძოლო გეგმები წარედგინა რუსეთის არმიას პოლკების, ბატალიონებისა და ოცეულების დონეზეც კი, რომლებიც საზღვრებთან არიან თავმოყრილი. ეს ახალი საგანგაშო ინფორმაციაა იმის სასარგებლოდბ რომ უკრაინაზე თავდასხმა უახლოეს დღეებში განხორციელდება.