უკრაინაში რუსეთის შეჭრისა და კიევში საომარი მოქმედებების დაწყების შემთხვევაში ყველაფერი მზადაა ქალაქის მთელი მოსახლეობის ევაკუაციისთვის. ამის შესახებ უკრაინის დედაქალაქის ადმინისტრაციის მუნიციპალური უსაფრთხოების დეპარტამენტის უფროსმა რომან ტკაჩუკმა განაცხადა.
„საომარი მოქმედებების შემთხვევაში მოხდება ევაკუაცია“, – თქვა მან და დააზუსტა, რომ ქალაქში მხოლოდ კრიტიკული ინფრასტრუქტურის სპეციალისტები და სამხედროები დარჩებიან. მათთან ერთად კიევში დარჩენის უფლება მიეცემა იმ სამოქალაქო პირებს, რომლებიც უარს იტყვიან ევაკუაციაზე.
ტკაჩუკის თქმით, საომარი მოქმედებების დაწყების შემთხვევაში კიევის მეტროპოლიტენი დღეში 6 საათის განმავლობაში იმუშავებს – დილით 3 საათი და საღამოს 3 საათი. დანარჩენ პერიოდში მეტროს თავშესაფრად გამოიყენებენ.
ხუთშაბათს, 17 თებერვალს, აშშ–ის პრეზიდენტმა ჯო ბაიდენმა განაცხადა, რომ ყველა ნიშანია უკრაინაში რუსეთის უახლოეს რამდენიმე დღეში შეჭრისთვის. მისი თქმით, აქვს ინფორმაცია, რომ რუსეთი „სხვისი დროშით“ აპირებს სამხედრო ოპერაციის ჩატარებას. კრემლის წარმომადგენელმა დმიტრი პესკოვმა განაცხადა, რომ ბაიდენის განცხადება დაძაბულობას ამწვავებს.