"სააკაშვილის გლდანის დაწესებულებაში გადაყვანა, ეს არის ცალსახა პროვოკაცია ხელისუფლების მხრიდან-ციხის საავადმყოფო არ აკმაყოფილებს იმ სტანდარტებს, რაც კონსილიუმმა განსაზღვრა," - ამბობს საქართველოს ექსპრეზიდენტის მიხეილ სააკაშვილის ადვოკატი ბექა ბასილაია. მისი თქმით, სააკაშვილის ციხის საავადმყოფოში გადაყვანა არც ჯანმრთელობის მიზნებისთვის არ არის მიზანშეწონილი და არც მისი უსაფრთხოებისთვის თვალსაზრისით.
"ნიკას გვარამიას გაჟღერებულ ინფორმაციას მეტს ვერ დავამატებ, თუმცა ის ინფორმაცია, რაც ნიკა გვარამიამ გააჟღერა, ნამდვილად გვაქვს. რაც შეეხება, უსაფრთხოებას, ისედაც კარგად გვესმის, საქართველოს მესამე პრეზიდენტის, პრეზიდენტის, რომელმაც ორგანიზებული დანაშაული დაამარცხა საქართველოში, გადაყვანა გლდანის დაწესებულებაში ეს არის ცალსახა პროვოკაცია ხელისუფლების მხრიდან. ჩვენ ყველამ კარგად ვიცით, რომ ციხის საავადმყოფო არც აკმაყოფილებს იმ სტანდარტებს, რაც კონსილიუმმა განსაზღვრა და უფრო მეტიც მიმდინარე პერიოდში იყო არაერთი შემთხვევა სხვადასხვა პატიმართან დაკავშირებით, არ მინდა სახელებით და გვარებით ვისაუბრო, როდესაც მოშიმშილე პატიმარი პირდაპირ გადაიყვანეს "ვივა მედში". ასეთი პრაქტიკა არსებობს, შესაბამისად ღარიბაშვილის განცხადება არის პოლიტიკური დევნის მკაფიო და აშკარა მაგალითი. რაც შეეხება, სააკაშვილის ჯანმრთელობას, ყველას გვესმის, რომ ყოველდღიურად მოშიმშილე ადამიანის ჯანმრთელობა სულ უფრო რთულდება", - განაცხადა ბასილაიამ.
ცნობისთვის, სააკაშვილის უფლებადამცველები მოითხოვენ ჰოსპიტალიზაციის საკითხი მიმდინარე საათებში გადაწყდეს და ციხის საავადმყოფო ღია განცხადებით გამოირიცხოს. მიხეილ სააკაშვილის ადვოკატის, „მთავარი არხის“ გენერალური დირექტორის, ნიკა გვარამიას, თქმით, ყველაზე მაღალი რისკი, რომელიც სააკაშვილს ემუქრება, გულის გაჩერებაა, შესაბამისად ციხის საავადმყოფოში კარდიოლოგიური სერვისის მეორე დონე უნდა არსებობდეს.
შეგახსენებთ, ნიკა გვარამია ეჭვობს, რომ ციხეში სააკაშვილის ლიკვიდაცია იგეგმება. მისი ვერსიით, იგეგმება იმიტირებული ბუნტი ციხის საავადმყოფოში, რომელიც დასრულდება სააკაშვილის ლიკვიდაციით. გვარამია ამტკიცებს, რომ ციხეში უკვე შეყვანილია რამდენიმე სპეცდანიშნულების პატიმარი, რომელიც სააკაშვილის ლიკვიდაციაზე იზრუნებს, თუმცა ეს დაბრალდება აღშფოთებულ ციხის პუბლიკას.
საქართველოს ყოფილი პრეზიდენტი, პატიმარი, მიხეილ სააკაშვილი შიმშილობს. მას საპატიმროში ხშირად სტუმრობს პირადი ექიმი ნიკოლოზ ყიფშიძე. მისი თქმით, სააკაშვილი მორალურად თავს კარგად გრძნობს, მაგრამ დღითი დღე უფრო და უფრო უჭირს სიარული, აქვს სისუსტე და სახეზე უფერულობა. საქართველოს პრემიერ-მინისტრი ღარიბაშვილი დაჟინებით ამტკიცებს, რომ სააკაშვილი პრივილეგირებული პატიმარი არასდროს იქნება. კითხვას, რამდენად განიხილება ოცნებაში სააკაშვილის გათავისუფლება, ღარიბაშვილი თავდაჯერებული პასუხობს: „გამორიცხულია! სააკაშვილი მინიმუმ 6 წელი იჯდება ციხეში!“
საქართველოს ყოფილი პრეზიდენტი მიხეილ სააკაშვილი 1 ოქტომბერს დააკავეს. ის რუსთავის მე-12 პენიტენციურ დაწესებულებაშია მოთავსებული. საქართველოს მესამე პრეზიდენტი ციხეში შიმშილობს და უკრაინის კონსულთან შეხვედრას ითხოვს. ის ციხიდან წერილებს რეგულარულად ავრცელებს. ექსპრეზიდენტი მიხეილ სააკაშვილი, რომელიც ამჟამად უკრაინის მოქალაქეა, ქართული ოცნების ხელისუფლების მიერ იძებნებოდა. მას ქართული სასამართლოს მიერ დაუსწრებლად აქვს მისჯილი პატიმრობა სანდრო გირგვლიანის გარდაცვალების და პარლამენტის ყოფილი დეპუტატის, ვალერი გელაშვილის ცემის საქმეებზე. 2018 წელს, ორივე საქმეზე სააკაშვილი დამნაშავედ ცნეს სამსახურებრივი უფლებამოსილების გადამეტებასა და ბოროტად გამოყენებაში. ვალერი გელაშვილის ცემის საქმეზე მიესაჯა 6 წლით, ხოლო სანდრო გირგვლიანის გარდაცვალების საქმეზე - 3 წლით. მიხეილ სააკაშვილის წინააღმდეგ აღძრულია სისხლის სამართლის კიდევ რამდენიმე საქმე. მესამე პრეზიდენტს ბრალად ედება 7 ნოემბერს მშვიდობიანი დემონსტრაციის დარბევა, „ტელეიმედში” შეჭრის სანქცირება და ბადრი პატარკაციშვილის ქონების უკანონოდ დაუფლება. ქართული მართლმსაჯულება მას ასევე სახელმწიფო დაცვის სპეციალური სამსახურის კუთვნილი თითქმის 9 მილიონი ლარის გაფლანგვაშიც ადანაშაულებს.