საქართველოს საკალათბურთო ნაკრების კაპიტანი თორნიკე შენგელია ბოლონიის „ვირტუსის“ დიდების დარბაზის წევრი გახდება, – ამის შესახებ ინფორმაცია იტალიურმა კლუბმა გაავრცელა.
ქართველი კალათბურთელის პატივსაცემად სპეციალური ცერემონია 6 ნოემბერს, ევროლიგის მატჩის დროს გაიმართება, რომელშიც „ვირტუსი“ „დუბაის“ უმასპინძლებს. შენგელია ბოლონიაში დაბრუნდება და კლუბის გულშემატკივრების წინაშე სპეციალურ ჯილდოს მიიღებს.
შენგელია Virtus 100 Hall of Fame-ის წევრი გახდება. ეს პროექტი კლუბის დაარსებიდან 100 წლის იუბილეს ეძღვნება და მიზნად ისახავს იმ ადამიანების დაფასებას, რომლებმაც „ვირტუსის“ ისტორიაში მნიშვნელოვანი კვალი დატოვეს.
საქართველოს ნაკრების კაპიტანი ბოლონიურ გუნდში 2022-2025 წლებში თამაშობდა და მისი ერთ-ერთი ლიდერი იყო. შენგელიამ „ვირტუსთან“ ერთად 2022 წელს – ევროთასი, ხოლო 2025 წელს იტალიის ჩემპიონატი მოიგო. გარდა ამისა, ქართველი კალათბურთელი იტალიის ჩემპიონატის ფინალური სერიის საუკეთესო მოთამაშედ (MVP) დასახელდა.
თორნიკე შენგელია ამჟამად „დუბაიში“ თამაშობს, ის გუნდის წევრი 2026 წლის ზაფხულში გახდა.
