Tesla-ს აღმასრულებელმა დირექტორმა ილონ მასკმა განაცხადა, რომ კომპანია Cybertruck-ის წარმოებას ტეხასის შტატის ქალაქ ოსტინში მდებარე ქარხანაში ეტაპობრივად შეამცირებს. ცვლილებები 2027 წლის შუა პერიოდიდან დაიწყება და მიზნად Cybercab-ის წარმოებისთვის დამატებითი სივრცის გამოთავისუფლებას ისახავს. ეს ქარხანა ამჟამად ერთადერთი საწარმოა, სადაც Cybertruck იწარმოება.
ჯერჯერობით უცნობია, შეწყდება თუ არა მოდელის წარმოება სრულად, თუ Tesla მის გამოშვებას სხვა საწარმოში გადაიტანს. თუმცა კომპანიის წამყვანი ინჟინრის, უეს მორილის განცხადება მიანიშნებს, რომ მოდელმა შესაძლოა წარმოების ციკლი დაასრულოს. მისი თქმით, Cybertruck მნიშვნელოვანი ტექნოლოგიური განვითარების პლატფორმა იყო და მისი ტექნოლოგიები Cybercab-ში გააგრძელებს არსებობას.
Cybertruck-ის გაყიდვები კომპანიის თავდაპირველ მოლოდინებს მნიშვნელოვნად ჩამორჩა. 2023 წელს მასკი ვარაუდობდა, რომ Tesla წელიწადში 500 000 ავტომობილს გამოუშვებდა. თუმცა კომპანიას მოდელის გაყიდვების ცალკე მონაცემები არ გამოუქვეყნებია. Tesla-ს ანგარიშგებით, მიმდინარე წელს სხვა მოდელების კატეგორიაში გაყიდული ავტომობილების რაოდენობა 37 000-ზე ნაკლებია, თუმცა ეს მაჩვენებელი Cybertruck-თან ერთად Model S-სა და Model X-საც მოიცავს.
მასკი Tesla-ს სამომავლო განვითარებას სულ უფრო მეტად ავტონომიურ ტრანსპორტსა და ჰუმანოიდ რობოტებს უკავშირებს. კომპანიის სტრატეგიის ერთ-ერთი მთავარი მიმართულება Cybercab-ია — თვითმართვადი ტაქსი, რომლის წარმოების გაფართოებისთვისაც Tesla ახლა საწარმოო რესურსების გადანაწილებას გეგმავს.
