სომხეთი და ჩინეთი სტრატეგიულ პარტნიორობაზე შეთანხმდნენ. სომხეთის მთავრობის ინფორმაციით, შესაბამისი შეთანხმება ჩინეთში, შანხაის თანამშრომლობის ორგანიზაციის სამიტის ფარგლებში მხარეებს შორის გამართული შეხვედრის დროს შედგა, რომელსაც სომხეთის პრემიერ-მინისტრი ნიკოლ ფაშინიანი და ჩინეთის პრეზიდენტი სი ძინპინი ესწრებოდნენ.
„შეხვედრის შედეგად მხარეებმა განაცხადეს სომხეთსა და ჩინეთს შორის სტრატეგიული პარტნიორობის დამყარების შესახებ“, – ნათქვამია სომხეთის მთავრობის პრესსამსახურის განცხადებაში.
მათივე ცნობით, შეხვედრაზე ლიდერებმა აღნიშნეს თანამშრომლობის განვითარების მნიშვნელობის შესახებ ისეთ სფეროებში, როგორებიცაა განათლება, მეცნიერება, კულტურა, ტურიზმი, ინფორმაციული ტექნოლოგიები. ნიკოლ ფაშინიანმა დაადასტურა სომხეთის მისწრაფება, გახდეს შანხაის თანამშრომლობის ორგანიზაციის წევრი და მიღწეულ იქნა შეთანხმება მის ფარგლებში თანამშრომლობის გაღრმავების შესახებ. შეხვედრის დასრულების შემდეგ გაკეთებულ ერთობლივ განცხადებაში ასევე აღნიშნულია, რომ ტაივანი ჩინეთის განუყოფელი ნაწილია.
