ევროპის ჩემპიონატზე საქართველოს ნაკრების წარმატებული ასპარეზობისა და სფფ-ის მიერ განხორციელებული პროექტების შესახებ ვრცელ სტატია უეფა-ს ჟურნალმა The Technician-მა გამოაქვეყნა.
ფეხბურთის განვითარების ისტორია, რომელიც წინ უძღვის საქართველოს ნაკრების წარმატებას 2024 წლის ევროპის ჩემპიონატზე
„ევროპის 2024 წლის ჩემპიონატზე საქართველოს ნაკრების ჯგუფიდან გასვლა ერთ-ერთი გამორჩეული მომენტი იყო. ტურნირის დებიუტანტმა დისციპლინითა და შემართებით მოიპოვა მერვედფინალის საგზური, სადაც მომავალ ჩემპიონ ესპანეთთან დამარცხდა. ჯგუფურ ეტაპზე ვილი სანიოლის გუნდმა არაერთი შთამბეჭდავი თამაში ჩაატარა, პორტუგალია 2:0 დაამარცხა და მთელი მსოფლიოს მასშტაბით გულშემატკივართა გულები მოიგო. საქართველოში კი ნაკრების თამაშმა ნამდვილი ეიფორია გამოიწვია.
მიუნხენის „ბაიერნისა“ და საფრანგეთის ნაკრების მაისურით სანიოლმა თავის კარიერაში მრავალი წარმატება იზეიმა. თუმცა, მისივე თქმით, საქართველოს ნაკრების თავკაცის როლში ევროპის ჩემპიონატზე მიღებული გამოცდილება განსაკუთრებული იყო.
„ევროპის ჩემპიონატზე ნაკრების გამოსვლამ ქართულ საზოგადოებაზე უდიდესი შთაბეჭდილება მოახდინა, ქვეყნის ისტორიიდან გამომდინარე, ქართველი ხალხი ერთიანობას ნატრულობდა და მან ის მთელი ტურნირის განმავლობაში მიიღო. საქართველოს ნაკრების მიერ დაწერილმა ისტორიამ უძლიერესი ეფექტი იქონია. შეიძლება ითქვას, რომ მოედანზე ნაჩვენები თამაშით ფეხბურთელებმა ქართველ ხალხს ოპტიმიზმი და უკეთესი მომავლის იმედი შესძინეს. რასაც ქართველი ხალხის თვალებში ვხედავდი, არასდროს დამავიწყდება. მხოლოდ ამისთვის ღირდა ეს გამოცდილება“, – აღნიშნა ვილი სანიოლმა.
სანიოლს მიაჩნია, რომ გერმანიაში ნაჩვენები თამაში დიდწილად ფეხბურთელების მიერ თავისუფლების შეგრძნების და შემტევი ფეხბურთის მიმართ მათი ბავშვური ენთუზიაზმის შედეგი იყო: „ჩვენ მიზნად არ გვქონდა დასახული ევროპის ჩემპიონატის მოგება. ყველამ იცოდა, რომ ეს არარეალური იყო. აქედან გამომდინარე, სოციალური და სპორტული კუთხით სხვა მწვრთნელებზე შედარებით მეტი წნეხი იყო. ჩვენი მთავარი ამბიცია გახლდათ, რომ საქართველოს ევროპული ფეხბურთის რუკაზე თავისი ადგილი დაემკვიდრებინა. გვსურდა, რომ ტურნირის ბოლოს ქართველ გულშემატკივარს და მთელ ქვეყანას ჩვენით ეამაყა. ეს იყო ჩვენი ერთადერთი მიზანი. ზედმეტი წნეხის გარეშე მუშაობა ბევრად იოლია“.
სანიოლი ცდილობდა არ გადაეტვირთა მოთამაშეები რთული ტაქტიკური ინფორმაციით: „ევროპის ჩემპიონატის დაწყებამდე ჩვენ წარმოვიდგინეთ, თუ როგორი ფეხბურთი უნდა გვეთამაშა. ფეხბურთელებს ვუთხარი, რომ მათ დაცვაში მომწიფებულად, შეტევაში კი „ბავშვურად“ უნდა ემოქმედათ. ამით ის ვიგულისხმე, რომ დაცვაში ძლიერი, ორგანიზებული, სტრუქტურულად დალაგებული და, რაც მთავარია, გუნდური თამაში იყო საჭირო. ხოლო რაც შეეხება „ბავშვურ შეტევას“, მოგეხსენებათ რომ ბავშვებს სწრაფად სურთ გოლების გატანა. სწორედ ასეთ მიდგომაზე გვსურდა აგვეგო ჩვენი თამაში, რამეთუ ის ჩვენი ფეხბურთელების ხასიათს შეესაბამებოდა“.
აღნიშნულმა მიდგომამ გაამართლა. სანიოლის გუნდს ჩემპიონატი არ მოუგია, თუმცა თავი დაამახსოვრა ყველას, ვინც გერმანიაში მისი ენერგიითა და შემართებით სავსე თამაშები იხილა. ყველასთვის, ვინც ბოლო ორი ათწლეულის მანძილზე ჩართული იყო ქართული ფეხბურთის განვითარებაში, ევრო 2024-ზე ნაჩვენები შთამბეჭდავი თამაში წარმოადგენს მკაფიო ხედვის, კარგად შესრულებული სტრატეგიული გეგმისა და მონდომების შედეგს.
სფფ-ის ფეხბურთის განვითარების ამბიციური გეგმა რამდენიმე საკვანძო მიმართულებაზე იყო აგებული – კაცთა და ქალთა ფეხბურთში მოთამაშეთა მასობრიობა; ახალგაზრდულ ფეხბურთში, მასობრივ ფეხბურთსა და მწვრთნელთა განათლებაში ინვესტირება; ასევე მსხვილი საერთაშორისო ტურნირების მასპინძლობა. ამ მნიშვნელოვან სტრატეგიულ მიმართულებებში ჩადებულ დროს, ძალისხმევასა და რესურსებს წარმატება მოჰყვა.
„ფეხბურთის ფედერაციაში მოსვლის პირველივე დღიდან ჩვენი გუნდის წინაშე მდგარ ერთ-ერთ მთავარ გამოწვევას მასობრივი ფეხბურთის გაძლიერება წარმოადგენდა. ესაა საფეხბურთო პირამიდის საფუძველი და ჩვენი წარმატების წინაპირობა. უეფა-ს დახმარებით ბოლო ათი წლის მანძილზე განხორციელებულმა პროექტებმა ქართული ფეხბურთის წინსვლა განაპირობა“, – განმარტავს სფფ-ის პრეზიდენტი ლევან კობიაშვილი.
ელიტურ დონეზე მოთამაშეთა ფონდის გაზრდას წინ უძღოდა ქვეყანაში ფეხბურთის პოპულარობის ამაღლება. 2015-2021 წლებში საქართველოში რეგისტრირებული კაცი ფეხბურთელების რაოდენობა 14,676-იდან 37,600-მდე გაიზარდა, ქალ ფეხბურთელთა რიცხვი კი გაათმაგდა. ამ სამუშაოს დიდი ნაწილი უეფა-ს მხარდაჭერით განხორციელდა.
სფფ-ის ვიცე პრეზიდენტი ნიკა ჯღარკავა: „2015 წლიდან ჩვენ ფედერაციაში დამკვიდრებული აზროვნება შევცვალეთ და ყოველდღიური საქმიანობის დიდი ნაწილი მასობრივი ფეხბურთის განვითარებაზე მივმართეთ. საზოგადოებას უნდა გაეცნობიერებინა, რომ ფეხბურთი ბევრად მეტია, ვიდრე მსოლოდ საერთაშორისო შეჯიბრები. ფეხბურთი ყველასთვისაა და სოციალური სარგებელი მოაქვს. შესაბამისად, გარდავქმენით არა მხოლოდ გარე კომუნიკაცია, არამედ ფედერაციის ხელმძღვანელობის დამოკიდებულებაც. სფფ-ის პრეზიდენტი, გენერალური მდივანი, აღმასრულებელი კომიტეტი თუ ყრილობა, ყველა ერთხმად საუბრობდა მასობრივი ფეხბურთის პრიორიტეტულობაზე, რასაც შედეგი ელიტურ დონეზეც მოყვება“.
სფფ-ის სტრატეგიის კიდევ ერთ საკვანძო ნაწილი იყო როგორც მასობრივ, ისე პროფესიულ ფეხბურთში მწვრთნელთა განვითარება. ამ მხრივ აქცენტი გაკეთდა ეროვნული ნაკრების ყოფილი და მოქმედი მოთამაშეებისთვის სპეციალური საგანმანათლებლო პროგრამების შემუშავებაზეც. ამის შესახებ სფფ-ის ტექნიკურმა დირექტორმა ზაზა ზამთარაძემ ისაუბრა: „მწვრთნელთა განათლების გარეშე ფეხბურთის განვითარება წარმოუდგენელია. ამ მხრივ ჩვენთვის ფასდაუდებელი იყო უეფა-ს მხარდაჭერა. მწვრთნელთა განათლება ჩემი საქმიანობაც არის და გატაცებაც. ამ მიმართულებით დაფიქსირებული წინსვლა ჩემთვის განსაკუთრებით სასიხარულოა. ამ პროცესში გამორჩეული ადგილი უკავია ახლახანს დასრულებულ უეფას B+A ლიცენზირების კურსს, რომელიც საქართველოს ნაკრების მოქმედ და ყოფილ მოთამაშეებს საშუალებას აძლევს, დაჩქარებული წესით ისწავლონ“.
ვრცლად პირველ არხზე
