ხელოვნური ინტელექტის ინდუსტრიაში კონკურენცია კვლავაც მძაფრია. ChatGPT-ის შემქმნელებმა სულ ახლახან ახალი მოდელი, GPT-5.2 წარადგინეს, რომელიც უკვე ხელმისაწვდომია ფასიანი მომხმარებლებისთვის. კონკურენცია პიკს აღწევს. საქმე ისაა, რომ Google-ის უახლესმა მოდელმა, Gemini 3-მა ბაზარზე სერიოზული აჟიოტაჟი გამოიწვია და სხვადასხვა რეიტინგში კონკურენტებს საგრძნობლად გაუსწრო. Gemini 3-ის გაშვებიდან სულ რაღაც ორ კვირაში OpenAI-ის ვიზიტორთა რაოდენობა თითქმის 6%-ით შემცირდა. ახლა კი მთავარი კითხვაა: რით უპირისპირდება ახალი GPT გუგლის „ყველაზე ჭკვიან“ მოდელს?
GPT-5.2 თუ Gemini 3?
OpenAI-ის მტკიცებით, ახალი მოდელი შეუცვლელი დამხმარეა „პროფესიულ საქმიანობაში“ – იქნება ეს ცხრილების შექმნა, კოდის წერა, რთული კონტექსტის გააზრება თუ მრავალსაფეხურიანი პროექტების მართვა. დამოუკიდებელი პლატფორმის, LMArena-ს მონაცემებით, GPT-5.2-მა ვებ-დეველოპმენტში მართლაც შთამბეჭდავი შედეგები აჩვენა და მეორე ადგილზე გავიდა (Claude Opus 4.5-ის შემდეგ), რითაც Gemini 3 Pro-ს აჯობა.
თუმცა, OpenAI-ს ჯერ კიდევ ბევრი აქვს სამუშაო. LMArena-ს ზოგად რეიტინგებში გუგლის მოდელები კვლავ დომინირებენ ტექსტის, ვიზუალური აღქმის, ფოტოებისა და ვიდეოების გენერირების კატეგორიებში.
ვის რა უპირატესობა აქვს?
რაც შეეხება ტექნიკურ ტესტებს (ბენჩმარკებს), აქ ცალსახა გამარჯვებული არ გვყავს. მაგალითად, კოდის წერის ტესტში (SWE-bench) GPT-5.2-მა 80%-იანი შედეგი აჩვენა, რითაც Gemini 3-ს (76.2%) გაუსწრო. ასევე, OpenAI-ის მოდელი ლიდერობს AIME 2025-ის ტესტში, სადაც 100%-იანი სიზუსტე დააფიქსირა.
სამაგიეროდ, Gemini 3-მა უკეთესი შედეგები აჩვენა Humanity’s Last Exam-სა (HLE) და MMMLU-ში. მოკლედ რომ ვთქვათ, ზოგან ერთი იმარჯვებს, ზოგან – მეორე და ყველაფერი დამოკიდებულია იმაზე, თუ რისთვის იყენებთ მოდელს.
ფუნქციონალი და ფასი
ფუნქციური თვალსაზრისით, გუგლს ერთი მნიშვნელოვანი უპირატესობა აქვს – ეკოსისტემა. Gemini 3 ინტეგრირებულია გუგლის მრავალ პროდუქტში, მათ შორის Google AI Mode-სა და NotebookLM-ში. გარდა ამისა, Gemini-ს მომხმარებლებს ფოტოებისა და ვიდეოების გენერირება ერთ სივრცეში შეუძლიათ, მაშინ როცა ChatGPT-ის შემთხვევაში ვიდეოსთვის Sora-ს აპლიკაციის გამოყენებაა საჭირო. შესაბამისად, „ყველაფერი ერთში“ პრინციპით, Gemini 3 უფრო მრავალფუნქციურ ინსტრუმენტად გამოიყურება.
ფასების პოლიტიკა ორივე გიგანტს თითქმის იდენტური აქვს. სტანდარტული გამოწერა თვეში 20 დოლარი ღირს, API-ზე წვდომის ტარიფები კი მცირედით განსხვავდება, თუმცა საბოლოო ჯამში, ხარჯი თითქმის თანაბარია.
მთლიანობაში, არჩევანი ინდივიდუალურ საჭიროებებზეა დამოკიდებული. თუ თქვენთვის კოდის წერა და მათემატიკური სიზუსტეა პრიორიტეტი, შესაძლოა GPT-5.2 უკეთესი არჩევანი იყოს, ხოლო თუ გუგლის ეკოსისტემაში მუშაობა და მულტიმედიური კონტენტი გჭირდებათ, Gemini 3-ს კონკურენციას ვერავინ უწევს.
წყარო: Mashable www.marketer.ge
