ნოემბრის ტესტმატჩების სერიის ბოლო მატჩში იაპონიასთან წაგების (23:25) შემდეგ საქართველოს მორაგბეთა ნაკრებმა მსოფლიო რაგბის კლასიფიკაციაში 1.51 ქულა დაკარგა, შესაბამისად, ორი საფეხურით დაქვეითდა და მე-13 ადგილზე გადაინაცვლა. შედეგად, მსოფლიო თასის წილისყრისას, რომელიც 3 დეკემბერს სიდნეიში გაიმართება, „ბორჯღალოსნები“ მესამე კალათაში მოხვდნენ.
წილისყრის წინ, მსოფლიო რეიტინგის გათვალისწინებით, მონაწილე ნაკრებები ექვსეულებად იქნებიან დაყოფილნი. განახლებული ფორმატის თანახმად, შეიქმნება ექვსი ოთხგუნდიანი ჯგუფი და მერვედფინალში პირველ-მეორე ადგილოსნებთან ერთად, ოთხიც საუკეთესო მესამეადგილოსანიც გავა.
პირველი კალათა: სამხრეთ აფრიკა, ახალი ზელანდია, ინგლისი, ირლანდია, საფრანგეთი, არგენტინა.
მეორე კალათა: ავსტრალია, შოტლანდია, ფიჯი, იტალია, უელსი, იაპონია.
მესამე კალათა: საქართველო, ურუგვაი, ესპანეთი, აშშ, ჩილე, ტონგა.
მეოთხე კალათა: სამოა, პორტუგალია, რუმინეთი, ჰონგ კონგი, ზიმბაბვე, კანადა.
2027 წლის მსოფლიო თასი ავსტრალიაშია პირველი ოქტომბრიდან 13 ნოემბრამდე პერიოდში ჩატარდება. ფინალურ ეტაპზე მონაწილეობას, 20-ის ნაცვლად, 24 ნაკრები მიიღებს.
