გსურთ თვალები დახუჭოთ ვენაში და გაიღვიძოთ ვენეციაში? თუ ვანკუვერის ხმაურში ჩაძიროთ და მშვიდ მთებში გაიღვიძოთ? ეს ნამდვილად შესაძლებელია მსოფლიოში ერთ-ერთი ყველაზე ცნობილი და ძველი სატრანსპორტო საშუალებით - მატარებლით.
წარმოგიდგენთ ყველაზე შთამბეჭდავ ღამის მარშრუტებს, რომლებიც ეკონომიურ და ეკოლოგიურად სუფთა მგზავრობას გთავაზობთ პოპულარული მიმართულებებით.
Nightjet- ვენა, ავსტრია - ვენეცია, იტალია
ავსტრიაში დღისით შეგიძლიათ ისარგებლოთ თვალწარმტაცი Railjet-ით, თუმცა, დროის თვალსაზრისით ყველაზე ეკონომიური ვარიანტია მშვიდი ÖBB Nightjet-ის სერვისით მგზავრობა, რომელიც 11 საათის განმავლობაში ულამაზეს ადგილებს გაივლის.
მატარებელი ვენიდან 21:49 საათზე გადის და ვენეციის სან-ლუსიაში 8:34 საათზე ჩადის. თუ საპირისპირო მიმართულებით გსურთ მგზავრობა, მატარებლების უმეტესობა ვენეციიდან 21:05 საათზე გადის და ვენაში 8:19 საათზე ჩადის.
ბილეთების ფასი ერთი ადგილისთვის 65 ევროდან იწყება, თუმცა, თუ კარგად გამოძინებას აპირებთ, ამ ვარიანტს არჩევას არ გირჩევთ. ამის ნაცვლად, აირჩიეთ კუპე, რომელიც ოთხიდან ექვს ადამიანზეა გათვლილი და მისი ფასი 125 ევროდან იწყება.
საძინებლიანი კაბინის ფასი, რომელიც ერთიდან სამ მგზავრზეა გათვლილი 204 ევროდან იწყება. ამ შემთხვევაში უფასო საუზმით სარგებლობაც არის შესაძლებელი.
“კალედონიური სლიპერი“ - ლონდონი, ინგლისი - შოტლანდია, დიდი ბრიტანეთი
ეს ისტორიული რეისი პირველად 1873 წელს შესრულდა, როდესაც ინგლისისა და შოტლანდიის ქალაქებს შორის პირველად გამოიყენეს საძილე ვაგონები. 2019 წელს რემონტის შემდეგ, მატარებელს დაემატა 75 ახალი ვაგონი, რომლებიც აღჭურვილი იყო მდიდრული ორადგილიანი კაბინებით.
დილით შეგიძლიათ ედინბურგში, გლაზგოში, ინვერნესში ან აბერდინში ჩახვიდეთ. თუმცა, თუ უფრო გრძელ მარშრუტს აირჩებთ, დასავლეთ მაღალმთიანეთის ქალაქ ფორტ უილიამიშიც ჩახვალთ.
მატარებელი ლონდონიდან ორშაბათიდან პარასკევის ჩათვლით საღამოს 9:15 საათზე, ან კვირაობით საღამოს 9 საათზე გადის და ფორტ უილიამში დილის 10 საათზე ჩადის. ეს შესაძლებლობას იძლევა, დატკბეთ პეიზაჟებით, ორშის თვალწარმტაცი ხიდით, ტროსახის ეროვნული პარკით და სხვა სანახაობებით.
ბილეთების ფასი 371 დოლარიდან 701 დოლარამდე მერყეობს. ორადგილიან კუპეში საუზმე ფასში შედის.
Nightjet - ციურიხი, შვეიცარია - ჰამბურგი, გერმანია
ÖBB-ის პოპულარული Nightjet-ის სერვისი ევროპის პოპულარულ ქალაქებს, ციურიხსა და ჰამბურგს აკავშირებს. მგზავრობას დაახლოებით 11 საათი სჭირდება. მატარებლები, როგორც წესი, ციურიხის HB-დან საღამოს 8:59 საათზე გადიან, ღამით გერმანიის გავლით ჩრდილოეთით მიემართებიან და ჰამბურგ-ალტონაში დილის 8:21 საათზე ჩერდებიან.
ბილეთების ფასები განსხვავებულია, მაგრამ, როგორც წესი, მერყეობს 160 ევროდან 180 ევრომდე.
XPT - სიდნეიდან მელბურნამდე
მიუხედავად იმისა, რომ არსებობს ფუფუნების სამგზავრო სერვისები, როგორიცაა The Ghan და Indian Pacific, ავსტრალიაში ასევე შეგიძლიათ იპოვოთ ბიუჯეტური ვარიანტები შორ მანძილზე მგზავრობისთვის. მატარებელი XPT სიდნეიდან მელბურნამდე ყოველ ღამე მოძრაობს.
ის სიდნეიდან ყოველ ღამე საღამოს 8:42 საათზე გადის და მელბურნში მეორე დილით 7:30 საათზე ჩადის. თუ გსურთ პეიზაჟებით დატკბეთ, ასევე არის დღის სერვისი.
ეკონომ კლასის ბილეთების ფასი დაახლოებით 99 ავსტრალიური დოლარიდან (64 აშშ დოლარი) იწყება და კომფორტის მიხედვით, 139 ავსტრალიურ დოლარამდე (90 აშშ დოლარი) იზრდება.
საძინებლიანი კუპეს ფასი დაახლოებით 235 ავსტრალიური დოლარიდან (153 აშშ დოლარი) იწყება.
„ღამის ექსპრესი“ - სტოკჰოლმი, შვედეთი - ბერლინი, გერმანია
თუ გსურთ შვედეთისა და გერმანიის დედაქალაქებს შორის ღამის საათებში იმგზავროთ, დიდი არჩევანი გაქვთ. Snälltåget-ი და SJ-ი სტოკჰოლმსა და ბერლინს შორის ღამის რეისებს ახორციელებენ.
SJ Euronight-ი სტოკჰოლმის ცენტრალური აეროპორტიდან 17:34 საათზე გადის და ბერლინის გესუნდბრუნენში მეორე დღეს, დილის 9:17 საათზე ჩადის. ადგილის ფასია 1,485 შვედური კრონა (155 აშშ დოლარი), საძილე ადგილი 2,355 შვედური კრონაა (246 აშშ დოლარი).
სნოლტოგეტის ღამის მატარებელი რომელიც სტოკჰოლმსა და ბერლინს აკავშირებს, მაისიდან ოქტომბრამდე სხვადასხვა თარიღში გადის.
შვედეთის დედაქალაქიდან სამხრეთის მიმართულებით რეისები საღამოს 4:20 საათზე იწყება და სამხრეთ შვედეთის ულამაზეს ტბებსა და ქალაქებში გაგატარებთ. ხოლო ბერლინში დილის 7:45 საათზე ჩახვალთ.
