იტალიელმა და ესპანელმა მკვლევრებმა შეიმუშავეს ახალი „ელექტრონული ცხვირი“ - მოწყობილობა, რომელსაც შეუძლია რეკორდული სიზუსტით ამოიცნოს და გაარჩიოს სხვადასხვა სუნი და აირების სახეობა – ამის შესახებ „ევროპულსი“ წერს.
ასეთი „ელექტრონული ცხვირები“ მოთხოვნადია სხვადასხვა სფეროებში: ისინი აუცილებელია საკვები პროდუქტების ხარისხის კონტროლისთვის, ჰაერის დაბინძურების მონიტორინგისთვის, წარმოებაში უსაფრთხოების უზრუნველსაყოფად, ასევე მედიცინაში ამოსუნთქული ჰაერიდან დაავადებების დიაგნოსტირებისთვის.
უახლესი „ელექტრონული ცხვირის“ მთავარი მახასიათებელი მისი მაღალი სელექციურობაა. ის უშეცდომოდ ამოიცნობს სპეციფიკურ ნივთიერებებს, როგორიცაა ამიაკი ან აცეტონის ორთქლი, სხვა უცხო სუნის არსებობის შემთხვევაშიც კი.
