ჩინეთის კიბერ მარეგულირებელმა უწყებამ (Cyberspace Administration of China, CAC) დაიწყო ორთვიანი კამპანია, რომლის მიზანია სოციალური ქსელების მონიტორინგი და ისეთი კონტენტის შეზღუდვა, რომელიც „ნეგატიურ“ ან „პესიმისტურ“ განწყობებს ავრცელებს. ახალი რეგულაციები მოიცავს იმ პოსტებსაც, რომლებიც ეკონომიკური რისკების, საზოგადოებრივი სკეპტიციზმის ან აპათიის ნიშნებს შეიცავს.
CAC-ის განცხადებით, ინიციატივა მიმართულია „ჯანსაღი და პოზიტიური ონლაინ გარემოს“ შესაქმნელად. უწყება სოციალურ პლატფორმებს ავალდებულებს, სწრაფად ამოიღონ პოსტები, რომლებიც ხელისუფლების შეფასებით ნეგატიურ განწყობას ასახავს. კამპანიის ფარგლებში შესაძლებელია ადმინისტრაციული ზომების გამოყენებაც, თუმცა ჯარიმების შესახებ კონკრეტული მექანიზმი საჯაროდ დაზუსტებული არ არის.
ინიციატივა, რომელიც საერთაშორისო მედიის შეფასებით საზოგადოებრივი აზრის გაკონტროლების მცდელობად აღიქმება, კიდევ უფრო ამკაცრებს უკვე არსებულ ცენზურულ პოლიტიკას ჩინეთის ონლაინ სივრცეში.
