Boeing-მა იანვრის დასაწყისში Alaska Airlines-ის Boeing 737 MAX 9-ზე მომხდარი ავარიის შემდეგ 737 Max-ის პროგრამის მენეჯერი ედ კლარკი გაათავისუფლა. ამის შესახებ CNBC წერს.
სტატიაში აღნიშნულია, რომ სწორედ ასე სურს კომპანიას აჩვენოს, რომ დიდ ყურადღებას აქცევს თვითმფრინავების უსაფრთხოებასა და ხარისხს.
კომპანიის კომერციული თვითმფრინავების განყოფილების ხელმძღვანელის, სტენ დილის თქმით, კომპანიაში ცვლილებები განპირობებულია იმით, რომ Boeing „აგრძელებს გაზრდილი აქცენტის კეთებას იმის უზრუნველსაყოფად, რომ მის მიერ მიწოდებული ყველა თვითმფრინავი აკმაყოფილებს ან აღემატება ხარისხისა და უსაფრთხოების ყველა მოთხოვნას“.
კლარკი Boeing-ში 18 წლის განმავლობაში მუშაობდა. იგი ხელმძღვანელობდა Max თვითმფრინავების წარმოების პროგრამას 2021 წელს, გარდა ამისა, ის ასევე ზედამხედველობდა თვითმფრინავების აწყობას რენტონის (ვაშინგტონი) ქარხანაში. აშშ-ის ფედერალური საავიაციო ადმინისტრაცია (FAA) ამჟამად ქარხნის შემოწმებას აწარმოებს.
კლარკის თანამდებობას დაიკავებს კეტი რინგგოლდი, რომელიც მსახურობდა Boeing 737-ის მიწოდების ვიცე-პრეზიდენტად. კომპანიამ ასევე შექმნა ახალი თანამდებობა - კომერციული თვითმფრინავების ხარისხის განყოფილების უფროსი ვიცე-პრეზიდენტი. აღნიშნულ თანამდებობას დაიკავებს ელიზაბეტ ლუნდი, Boeing-ის საავიაციო პროგრამების ვიცე პრეზიდენტი.
იანვრის დასაწყისში Alaska Airlines-ის Boeing 737 MAX 9 ავარიის შემდეგ იანვრის თვეში Boeing-მა ბაზარს მხოლოდ 27 თვითმფრინავი მიაწოდა - ეს 29%-ით ნაკლებია 2023 წლის პირველ თვესთან შედარებით. იანვარში, Alaska Airlines-მა დაასრულა თავისი Boeing 737 MAX 9 თვითმფრინავების პირველი ჯგუფის ინსპექტირება, რამაც საშუალება მისცა თვითმფრინავი ექსპლუატაციაში დაებრუნებინა.
22 იანვარს აშშ-ს საავიაციო ფედერალურმა ადმინისტრაციამ (FAA) რეკომენდაცია გაუწია ავიაკომპანიებს, რომლებიც მოქმედებენ Boeing 737-900ER თვითმფრინავებზე, შეამოწმონ კარების ლუქები, რათა უზრუნველყონ მათი სათანადო დაცულობა.
Alaska Airlines-ის სამგზავრო თვითმფრინავმა 4 876 მეტრის სიმაღლეზე ფრენისას კორპუსის ნაწილი დაკარგა, რის გამოც აშშ-ს ორეგონის შტატში ავარიულად დაშვება მოუწია.
