წელს მსხვილი გარიგება შედგა ენერგეტიკის სექტორშიც. კერძოდ, ბირთვული ენერგიის კომპანია Constellation Energy-მ $29.4 მილიარდად ბუნებრივი აირის მწარმოებელი Calpine-ი იყიდა. როგორც ირკვევა, გაერთიანების მიზანი უფრო მსხვილი, მძლავრი კომპანიის შექმნაა, რომელიც ძალების გაერთიანებით უფრო მეტ მომავალ პარტნიორს მოიზიდავს.
წელს იაპონიამ ნამდვილად გამოიჩინა თავი. ათეულში მე-9 ადგილზე $27.5 მილიარდიანი მერჯერით Sumitomo Corporation-ი გავიდა. საკმაოდ ფართოპროფილური კონგლომერატი, რომელმაც თვითმფრინავების გამსესხებელი კომპანია Air Lease-ი შეიძინა და პორტფელი კიდევ უფრო გაადიდა. ცხადია, მიზანი მეტალების წარმოების, წიაღისეულის მოპოვებისა და ინფრასტრუქტურული პროექტების განხორციელების მიღმა შემოსავლის კიდევ ერთი ღირებული წყაროს გაჩენაა.
და ბოლოს, წლევანდელ ათეულს ხურავენ Abbot Laboratories-ი და Exact Sciences-ი. სამედიცინო ინდუსტრიის კომპანიები, რომელთა გაერთიანების მოცულობამაც $25.7 მილიარდი შეადგინა. ამ მერჯერით სამედიცინო დანადგარებისა და დიაგნოსტიკის გიგანტმა Abbot-მა ბიოტექნოლოგიური კომპანია შემოიერთა. კომპანია, რომელიც სიმსივნის აღმოჩენის უნიკალურ, არაინვაზიურ მეთოდებს ავითარებს.
მოკლედ, ასეთი იყო 2025 წლის მთავარი კორპორაციული გარიგებები. წესით, ახლა ამ 10-ეულში პირველ ან მეორე ადგილს Warner Brothers-ის შეძენის სიახლე უნდა იკავებდეს, თუმცა Paramount-სა და Netflix-ს შორის ბრძოლა გრძელდება. გრძელდება და მათ შორის გამარჯვებული მომავალი წლის ჩვენი სტატისტიკის ათეულში ნამდვილად მოხვდება.
