„მასწავლებლების პროფესიული უნარები შეუსაბამოა სკოლის წინაშე მდგომ ამოცანებთან. ამიტომ, საჭიროა მასწავლებელთა კორპუსის გადამზადება და გადახალისება“, - ამის შესახებ განათლების ყოფილმა მინისტრმა „კომერსანტთან“ საუბრისას განაცხადა.
შეგახსენებთ, რომ PISA-მ (მოსწავლის საერთაშორისო შეფასების პროგრამა), 2022 წლის შედეგები გამოაქვეყნა, სადაც საქართველო 81 ქვეყანას შორის 67-ე ადგილზეა კითხვისა და წაკითხულის გააზრების მაჩვენებლით, მე-60-ზე - მათემატიკისა და 66-ეზე მეცნიერების ცოდნით.
გია ნოდია ამბობს, რომ ეს შედეგები მოულოდნელი არ ყოფილა, მაგრამ გაუარესების ტენდენციაა. რაც იმას ნიშნავს, რომ „განათლების, განსაკუთრებით ზოგადი განათლების, სისტემა არ დგას სათანადო დონეზე“ და მდგომარეობის გამოსასწორებლად ძირეული რეფორმების გატარებაა საჭირო.
„ეს მოულოდნელი შედეგები არ იყო. ყოველთვის დაბალი მაჩვენებელი გვქონდა. თან გაუარესების ტენდენციაც არის. ეს ნიშნავს იმას, რომ განათლების, განსაკუთრებით ზოგადი განათლების, სისტემა არ დგას სათანადო დონეზე. ამას სჭირდება სერიოზული რეფორმები, რაც ნიშნავს ამ სფეროს რეალურ პოლიტიკურ პრიორიტეტად ქცევას, დაფინანსების გაზრდას, მაგრამ მხოლოდ დაფინანსების გაზრდა ავტომატურად არაფერს შველის. საჭიროა, გარკვეული პოლიტიკური გაბედულებაც ხელისუფლების და განათლების სამინისტროს მხრიდან“, - ამბობს გია ნოდია.
მისი თქმით, განათლების სისტემის რეფორმა რთულია, არაპოპულარულია და „ჯერჯერობით მისი გატარება ვერავინ შეძლო“, რადგან მას წინააღმდეგობა, პირველ რიგში, საგანმანათლებლო დაწესებულებებში, მასწავლებლების მხრიდან, ხვდება.
„საჭიროა, ერთის მხრივ, პედაგოგიკის თვალსაზრისით ცვლილებები, სწავლების უფრო ეფექტიანი მეთოდების დანერგვა, რომელიც მართლაც ორიენტირებულია წაკითხულის გააზრებაზე, ბავშვის აზროვნების განვითარებაზე და არა უბრალოდ ფაქტების და ტექსტების დასწავლაზე - ეს მეთოდიკის ნაწილია, მაგრამ, რა თქმა უნდა, მნიშვნელოვანია. ფუნდამენტური პრობლემაა ის, რომ მასწავლებლების პროფესიული უნარები შეუსაბამოა სკოლის წინაშე მდგომ ამოცანებთან. ამიტომაა რთული და არაპოპულარული განათლების სისტემაში რეფორმების გატარება. ამას წინააღმდეგობა შეხვდება თვითონ საგანმანათლებლო დაწესებულების მხრიდან. მაგრამ სხვანაირად სიტუაცია ვერ გამოსწორდება“, - აცხადებს გია ნოდია.
