ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს წარმომადგენლებმა, შრომის საერთაშორისო ორგანიზაციის წევრებმა და დარგის ექსპერტებმა, სამუშაო ჯგუფის ფორმატში, უმუშევრობის დაზღვევის სისტემის განვითარების პერსპექტივები განიხილეს – ინფორმაციას ჯანდაცვის სამინისტრო ავრცელებს.
„სტუმრებს, ჯანდაცვის მინისტრმა მიმართა. უწყების ხელმძღვანელმა ყურადღება, საქართველოში, უმუშევრობის დაზღვევის სისტემის დანერგვის შესაძლებლობებზე გაამახვილა და განაცხადა, რომ აღნიშნული, ქვეყანაში, დასაქმებულთა სოციალური დაცვის სისტემის გაძლიერებისა და სოციალური რისკების დაზღვევისთვის, მნიშვნელოვან მექანიზმს წარმოადგენს.
სამუშაო ჯგუფის ფორმატში, ასევე, განსაკუთრებული ყურადღება დაეთმო, უმუშევრობის დაზღვევის განვითარების სამოქმედო გეგმის შემუშავებასა და ქვეყნის სპეციფიკური გამოწვევებისა და არსებული სოციალური ინფრასტრუქტურის შესაბამისად, დაზღვევის მოდელების განსაზღვრას.
შრომის საერთაშორისო ორგანიზაციის (ILO) და Expertise France-ს წარმომადგენლებმა, ქართულ მხარეს, ამ მიმართულებით, საკუთარი ხედვები და გამოცდილება გაუზიარეს.
შეხვედრას, მინისტრის მოადგილე გიორგი ცაგარეიშვილი, განათლების მინისტრის მოადგილე ბაია კვიციანი, დამსაქმებელთა ასოციაციის პრეზიდენტი ელგუჯა მელაძე, სხვადასხვა უწყების წარმომადგენლები, დარგის სპეციალისტები და საერთაშორისო ორგანიზაციის წევრები ესწრებოდნენ“ - ნათქვამია ინფორმაციაში.
