იაშვილის ბავშვთა ცენტრალური საავადმყოფო "ბაკურიანი ციდას" წყლით, ბავშვის შესაძლო ინტოქსიკაციაზე განცხადებას ავრცელებს, სადაც ინფორმაციას იმის შესახებ რომ კლინიკაში ინტოქსიკაციით 120 ბავშვია ჰოსპიტალიზებული არ ადასტურებს.
კლინიკაში იმასაც ამბობენ, რომ მათთან ინტოქსიკაციით მკურნალობას ერთი ბავშვი გადის, მიზეზები კი მოკვლევის შემდეგ გახდება ცნობილი.
"სოციალურ ქსელში გავრცელებული ინფორმაცია, რომ იაშვილის ბავშვთა ცენტრალურ საავადმყოფოში ინტოქსიკაციით იმყოფება 120 ბავშვი, არ შეესაბამება სინამდვილეს.
დღევანდელი დღის მონაცემებით ჩვენს საავადმყოფოში სავარაუდო ინტოქსიკაციის დიაგნოზით მკურნალობას გადის მხოლოდ ერთი პაციენტი.
შესაბამისი ორგანოების მოკვლევის შედეგად გახდება ცნობილი ინტოქსიკაციის მიზეზები. ამ ეტაპზე ბავშვის მდგომარეობა სტაბილურია", - ნათქვამია იაშვილის ბავშვთა ცენტრალურ საავადმყოფოს განცხადებაში.
