„არ დაუშვათ ავტომობილში ბავშვის დატოვება, რადგან ტემპერატურა სწრაფად აღწევს 17-დან 49 გრადუსამდე“,- ამის შესახებ პედიატრი ლალი ჯანაშია სოციალურ ქსელში წერს.
ამასთან, პედიატრი გარემოში არსებული მაღალი ტემპერატურის ზეგავლენის პრევენციის და გართულებების თავიდან აცილების მიზნით, რამდენიმე რჩევას გასცემს.
„ავტომობილში ტემპერატურა სწრაფად აღწევს 49 გრადუსამდე“
თემის აქტუალურობიდან გამომდინარე მის პოსტს უცვლელად გთავაზობთ:
„გარდაუვალი აუცილებლობის გარდა, თავი შეიკავეთ 11 საათიდან 19 საათამდე გარეთ ყოფნისგან. არ დაუშვათ პატარების დახურულ სივრცეში დატოვება, განსაკუთრებით ავტომობილში, რომელშიც ტემპერატურა სწრაფად აღწევს 17-დან 49°C მდე.
განსაკუთრებული სიფრთხილე გამოიჩინეთ 1 წლის ასაკამდე ბავშვების შემთხვევაში, რომელთა თერმორეგულაციის ცენტრი უმწიფარია და პირდაპირ დამოკიდებულებაშია სხეულის ტემპერატურა გარემოს ტემპერატურასთან. ხშირად გადაავლეთ გრილი დუში, რადგან ოფლის ჭარბ გამოყოფას ახლავს კანის პასუხი ე.წ. ნაოფლის გამონაყარის სახით, რომელსაც ქავილი და დისკომფორტი ახლავს.
ჩააცვით ბავშვებს გრილი, ფართო და თხელი სამოსი, დამზადებული ნატურალური მასალისგან. მიეცით დიდი რაოდენობით სითხეები, ელექტროლიტებით მდიდარი მზა და მარტივად მოსამზადებელი ხსნარები. შეძლებისდაგვარად უზრუნველყავით მოხუცების და ბავშვების ადგილსამყოფელი სავენტილაციო საშუალებებით. გარეთ არ უნდა იყონ:
- მცირე ასაკის და ხანდაზმული ადამიანები;
- გულსისხლძარღვთა სისტემის,ფილტვის უკმარისობის მქონე და ასევე, ჭარბწონიანი ადამიანები;
- ყველაზე მძიმე გართულებები: გადახურებით გამოწვეული კუნთების სპაზმი(კრუნჩხვა); სითბური გამოფიტვა; სითბური გადახურება(ყველაზე მძიმე გართულება).
არ შეიძინოთ ბურღულეული და მალფუჭებადი პროდუქტები ღია სივრცეებში, რომელშიც არ არის კონდიცირების და ვენტილაციის სისტემა. მაცივარში ულუფებად დაფასოებული პროდუქტები შეინახეთ. დაუშვებელია გაყინული პროდუქტის გალღობის შემდეგ დარჩენილი ხორცპროდუქტების საყინულეში ჩაბრუნება.
თუ თქვენი ოჯახის წევრი დიდხანს დარჩა მაღალ ტემპერატურაზე და აღენიშნება ძლიერი სისუსტე, თავის და კუნთების ტკივილი, ცხელება, წნევის დაბალი ციფრები, ან ცხელება, რომელსაც არ ახლავს კატარალური მოვლენები, გადაიყვანეთ გადაუდებელი დახმარების დაწესებულებაში. სიფრთხილისკენ მოწოდებასთან ერთად ჯანმრთელობას გისურვებთ,“ - წერს ლალი ჯანაშია.
