საქართველოს პრემიერ-მინისტრის, ირაკლი კობახიძის განცხადებით, ცენტრალური აზიის ქვეყნებთან თანამშრომლობის გაღრმავება საქართველოსთვის სტრატეგიულ მნიშვნელობას ატარებს და ქვეყნის ეკონომიკურ განვითარებას მნიშვნელოვნად შეუწყობს ხელს.
პრემიერის თქმით, საქართველო ცენტრალურ აზიას შავ ზღვასა და დასავლურ სივრცესთან აკავშირებს, რაც ქვეყანას რეგიონული თანამშრომლობის მნიშვნელოვან ცენტრად აქცევს. მისი შეფასებით, სწორედ ამიტომ იზრდება ცენტრალური აზიის სახელმწიფოების ინტერესი საქართველოსთან ეკონომიკური, სავაჭრო და სატრანსპორტო კავშირების გაფართოების მიმართ.
ირაკლი კობახიძემ აღნიშნა, რომ ბოლო პერიოდში ცენტრალური აზიის ქვეყნებთან ურთიერთობები განსაკუთრებით გააქტიურდა, რაც როგორც პოლიტიკური დიალოგის, ისე ეკონომიკური თანამშრომლობის გაღრმავებაში აისახება. მისი თქმით, ამ პროცესის შედეგად საქართველო დამატებით შესაძლებლობებს იღებს ვაჭრობის, ინვესტიციების, ტრანზიტისა და ლოგისტიკის მიმართულებით.
პრემიერის შეფასებით, თანამშრომლობის გაძლიერება ხელს შეუწყობს საქართველოს სატრანზიტო ფუნქციის ზრდას და ქვეყნის პოზიციების განმტკიცებას რეგიონულ ეკონომიკურ რუკაზე. ამასთან, მისი თქმით, ცენტრალური აზიის ქვეყნებთან პარტნიორობის განვითარება ახალი პროექტების განხორციელებისა და ბიზნესკავშირების გაფართოების შესაძლებლობას ქმნის.
კობახიძის განცხადებით, საქართველოსა და ცენტრალური აზიის ქვეყნებს შორის არსებული თანამშრომლობა მომავალ წლებში კიდევ უფრო გაღრმავდება, რაც როგორც რეგიონული დაკავშირებადობის, ისე ეკონომიკური განვითარების კუთხით დამატებით შედეგებს მოიტანს.
მისი თქმით, საქართველო 7 ქვეყანას აკავშირებს შავ ზღვასთან და შესაბამისად, დასავლეთის სივრცესთან სავაჭრო-ეკონომიკური თვალსაზრისით, ამ პოტენციალის მაქსიმალურად გამოყენება მნიშვნელოვანია.
„ამ კუთხითაც მნიშვნელოვანია ტაჯიკეთთან ჩვენი თანამშრომლობის გაღრმავება. ასევე იცით, რომ ცოტა ხნის წინ გვქონდა ვიზიტი ყირგიზეთში, მალე გვექნება ვიზიტი ყაზახეთში, ივლისის თვეში საქართველოში ჩამოდიან უზბეკეთისა და თურქმენეთის პრეზიდენტები, შესაბამისად, გვაქვს ძალიან კარგი დინამიკა ურთიერთობებში და ეს ყველაფერი ხელს შეუწყობს ჩვენი სატრანზიტო ფუნქციის განვითარებას. იცით, რომ დიდი ინვესტიციები იდება ამ ყველაფერში დაკავშირებადობის, სატრანზიტო ფუნქციის გაძლიერებაში, ამასთან ერთად დიდი მნიშვნელობა ენიჭება ურთიერთობების განვითარებას როგორც მეზობელ ქვეყნებთან, იცით, რომ შესანიშნავი ურთიერთობები გვაქვს აზერბაიჯანთან, სომხეთთან, თურქეთთან, ასევე მაქსიმალურად ვავითარებთ ურთიერთობებს ცენტრალური აზიის ქვეყნებთან. ამ პროცესების საფუძველზე საქართველო ბევრად უფრო წინ წავა საკუთარი ეკონომიკური პოტენციალის ათვისების თვალსაზრისით. ეს არის ჩვენი ერთ-ერთი უმთავრესი პრიორიტეტი“, - განაცხადა ირაკლი კობახიძემ.
