ჯაფარიძესა და ხაზარაძეს არაფერი აქვთ სათქმელი, ისინი გაურბიან მისვლას საგამოძიებო კომისიაში, ეს არის მათი არჩევანი, საქართველოში მოქმედებს კანონები და ამ კანონების მიხედვით გაგრძელდება პროცედურები, - ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს განუცხადა.
როგორც მთავრობის მეთაურმა აღნიშნა, არის ძალიან მკაფიო შემთხვევები, რასთან დაკავშირებითაც საგამოძიებო კომისიას სურს მეტი ინფორმაციის მიღება.
„ამ ადამიანებს არაფერი აქვთ სათქმელი, არის ძალიან მკაფიო შემთხვევები, რასთან დაკავშირებითაც საგამოძიებო კომისიას სურს მეტი ინფორმაციის მიღება, გამომდინარე იქიდან, რომ ეს საკითხები არის უხერხულობის შემცველი შესაბამისი ადამიანებისთვის, რომლებიც არიან ეჭვმიტანილი კონკრეტული მძიმე დანაშაულების ჩადენაში, ისინი გაურბიან მისვლას საგამოძიებო კომისიაში, ეს არის მათი არჩევანი. საქართველოში მოქმედებს კანონები და ამ კანონების მიხედვით გაგრძელდება პროცედურები“, - განაცხადა ირაკლი კობახიძემ.
თბილისის საქალაქო სასამართლომ ოპოზიციონერ პოლიტიკოსს პარტია „ძლიერი საქართველოდან“ ბადრი ჯაფარიძეს 50 000 ლარიანი გირაოს გადახდა შეუფარდა. ამით მოსამართლე ეკა ბარბაქაძემ პროკურატურის შუამდგომლობა დააკმაყოფილა.
ბადრი ჯაფარიძეს პროკურატურამ ბრალი წაუყენა „ქართული ოცნების“ პარლამენტის მიერ შექმნილი დროებითი საგამოძიებო კომისიის სხდომაზე გამოუცხადებლობის გამო - მას, ისე, როგორც მის თანაგუნდელ მამუკა ხაზარაძეს, 25 მარტს ელოდნენ, როცა გამოკითხვა ტარდებოდა შპს „მაგნატის“ საქმეზე. იმის გამო, რომ ისინი მოქმედი პარლამენტის ლეგიტიმურობას არ ცნობენ, სხდომაზე არ გამოცხადდნენ.
„ქართული ოცნების“ ერთ-ერთმა ლიდერმა, რომელიც, ამავდროულად, არის კომისიის თავმჯდომარე, თეა წულუკიანმა მათი საქმეები გამოსაძიებლად პროკურატურას გაუგზავნა.
ბადრი ჯაფარიძეს სისხლის სამართლის კოდექსის 349-ე, - „საქართველოს პარლამენტის დროებითი საგამოძიებო კომისიის კანონიერი მოთხოვნის შეუსრულებლობის“ მუხლით ბრალი 4 აპრილს წაუყენეს. იმავე მუხლით წაუყენეს ბრალი 1 აპრილს მის თანაგუნდელ მამუკა ხაზარაძესაც. მას აღკვეთის ღონისძიებად 50 000-ლარიანი გირაო 2 აპრილს შეუფარდეს.
ორივე მათგანს ჯარიმის დაკისრება ან ერთ წლამდე პატიმრობა ემუქრება.
