ქალბატონი ლომჯარია მოუწოდებდა სხვებს გზის გადაკეტვას და თვითონ ტროტუარს არ ჩაცილებულა. ესეც საინტერესო მომენტია, როგორ წირავენ ადამიანებს სასჯელისთვის ის ხალხი, რომლებიც პირდაპირ კონტაქტები არიან უცხო ძალების და უცხო დაკვეთის გამჟღერებლები, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.
მისივე თქმით, პროცესები გარედან მართულია. როგორც პაპუაშვილმა განაცხადა, პრეზიდენტის სასახლის შტურმის მცდელობა ქვეყნის გადატრიალების გარედან დაწერილი და მართული გეგმა იყო, რომელიც ჩაიშალა.
„დაკვეთა მოდის გარედან. ჩვენ ვიხილეთ ფინეთის საგარეო საქმეთა მინისტრი, რომელმაც ასევე გადაკეტა გზა და იმყოფებოდა რუსთაველის გამზირზე. ის შემთხვევით კი არ მივიდა, ეს იყო ნიშანი და დავალების გაზიარება, რომ უნდა შეუქმნან თბილისის მოსახლეობას ამგვარი დისკომფორტი. ამ დავალებას ასრულებენ. ესაა პარადოქსი. მზად არიან, ციხეშიც წავიდნენ, ოღონდ უცხოელების დავალება შეასრულონ. სამწუხარო რეალობაა, რასაც ვაკვირდებით ამ ჯგუფების სახით, რომლებსაც ყველანაირი კავშირი ეროვნულ ინტერესთან, ქვეყანასთან დაკარგული აქვთ. იყურებიან გარედან, ვინ რას ეტყვის.
მივიდა ფინეთის საგარეო საქმეთა მინისტრი, აჩვენა ამით, რომ აქ უნდა იდგეთ და გადაკეტოთ და არ დაემორჩილოთ კანონს. არადა, თვითონ ჰელსინკიში ხალხს იჭერენ ამის გამო, როცა გზებს კეტავენ. 50 ადამიანი დაიჭირეს ამის გამო და ჩვენთან თვითონ გადაკეტა ფინეთის საგარეო საქმეთა მინისტრმა გზა. ასე რომ, როგორც აქამდე იყო სრულად გარედან მართული ეს პროცესი, თავის დაწყებიდან და მიმდინარეობით. მათ შორის, ვიხილეთ პრეზიდენტის სასახლეზე შტურმი, როგორ ორკესტრირებულად იყო გარედან მხარდაჭერილი. შტურმის პარალელურად მიდიოდა მხარდამჭერი განცხადებები ევროპარლამენტარებისგან თუ სხვადასხვა პოლიტიკოსისგან. ეს ქვეყნის გადატრიალების გარედან დაწერილი და მართული გეგმა იყო, რომელიც ჩაიშალა. ქალბატონი ლომჯარია მოუწოდებდა სხვებს გზის გადაკეტვას და თვითონ ტროტუარს არ ჩაცილებულა. ესეც საინტერესო მომენტია, როგორ წირავენ ადამიანებს სასჯელისთვის ის ხალხი, რომლებიც პირდაპირ კონტაქტები არიან უცხო ძალების და უცხო დაკვეთის გამჟღერებლები“,- განაცხადა შალვა პაპუაშვილმა.
