საგარეო საქმეთა საბჭოს დასრულების შემდეგ, ევროკავშირის უმაღლესი წარმომადგენელი ჟოზეპ ბორელი აცხადებს, რომ საქართველოს უმაღლესი თანამდებობის პირების ნათქვამი, თითქოს კანონი „უცხოეთის გავლენის გამჭვირვალობაზე“ ქვეყანას ევროკავშირთან აახლოებს, დეზინფორმაციაა.
„დასანანია, რომ ევროკავშირისა და მისი ღირებულებების შესახებ ოფიციალური აქტორებისგან, საქართველოს უმაღლესი თანამდებობის ვისმენთ დეზინფორმაციას, თითქოს, - მართლაც გასაკვირია, - ეს კანონი ქვეყანას ევროკავშირთან აახლოებს. მინდა გარკვევით განვაცადო: არა! არა!“ - განაცხადა ჟოზეპ ბორელმა.
„ეს კანონი და მის გარშემო განვითარებული ყველა ნეგატიური მოვლენა საქართველოს ევროკავშირისგან აშორებს. არ შემიძლია ეს ამაზე უფრო მკაფიოდ და უფრო მოკლედ ვთქვა. ეს აშორებს საქართველოს ევროკავშირისგან“, - განაცხადა ევროკავშირის უმაღლესმა წარმომადგენელმა საგარეო პოლიტიკის საკითხებში.
მისი განცხადებითვე, ამ პოზიციას ევროკავშირის 27 წევრი ქვეყნიდან 26 იზიარებს, თუმცა „პოლიტიკური შეფასების გასაკეთებლად კონსენსუსი არ არის საჭირო“.
საქართველოს პრემიერ-მინისტრმა ირაკლი კობახიძემ 28 მაისს განაცხადა, რომ „თუ კანონპროექტის ინიციირებამდე ნულის ტოლი იყო ევროკავშირთან მოლაპარაკებების გახსნის შანსი, ეს შანსი ბევრად გაზრდილია“.
ორშაბათს, 24 ივნისს, ევროკავშირის წევრი ქვეყნების საგარეო საქმეთა მინისტრებმა ლუქსემბურგში საგარეო საქმეთა საბჭოზე (FAC), სხვა საკითხებთან ერთად, საქართველოში მიმდინარე მოვლენები და ევროკავშირის შესაძლო საპასუხო ზომები განიხილეს.
