საქართველოში რეგისტრირებული მანქანების რაოდენობა 1.9 მლნ ერთეულს გადასცდა. კერძოდ, მომსახურების სააგენტოს ბოლო მონაცემებით, ქვეყანაში 1 912 866 ავტომობილია გაფორმებული.
მოსახლეობისა და ავტომობილების რაოდენობას შევაფარდებთ, გამოდის, რომ ახლა უკვე 1.9 კაცზე 1 მანქანა მოდის. 2024 წელს 2 კაცზე 1 მანქანა მოდიოდა, ხოლო, 10 წლის წინ, 3 კაცზე 1 ავტომობილი.
შეგახსენებთ, რომ 2025 წლის 1-ლი იანვრის მდგომარეობით საქართველოს მოსახლეობამ 3 704 500 კაცი შეადგინა, 2024 წლის მდგომარეობით 3 694 600, ხოლო 10 წლის წინ, 2015 წელს, 3 721 916 იყო.
ამასთან, მომსახურების სააგენტოს ბოლო მონაცემით, ქვეყანაში 1 666 841 მართვის მოწმობაა გაცემული.
სტატისტიკის ეროვნული სამსახურის 2025 წლის ბოლო მონაცემებით, საქართველოში ყველაზე მეტი MERCEDES-BENZ-ის მარკის ავტომობილია, შემდეგ პოზიციებზეა TOYOTA, FORD-ი და VAZ.
უფრო კონკრეტულად, გთავაზობთ, ტოპ-10 ბრენდის ავტომობილს, რომელიც საქართველოში ყველაზე დიდი რაოდენით მოძრაობს:
- MERCEDES-BENZ – 223 300 ერთეული
- TOYOTA – 201 556 ერთეული
- FORD – 178 983 ერთეული
- VAZ – 153 086 ერთეული
- OPEL – 147 021 ერთეული
- BMW – 85 818 ერთეული
- VOLKSWAGEN – 77 271 ერთეული
- NISSAN – 71 497 ერთეული
- HONDA – 71 274 ერთეული
- MITSUBISHI – 56 792 ერთეული
