ქუთაისსა და რუსთავში საუნივერსიტეტო ქალაქების მშენებლობა იგეგმება, რომელში - ამის შესახებ საქართველოს მთავრობის 9 თებერვლის განკარგულებიდან ხდება ცნობილი.
განკარგულების თანახმად, მუნიციპალიეტეტებს პროექტში ჩართულობა ეთხოვათ, რაც გულისხმობს როგორც მოსახლეობის ინფორმირებაში დახმარებას, ასევე სხვადასხვა ეტაპზე შესაბამისი სანებართვო გადაწყვეტილებების მიღება.
„საუნივერსიტეტო ქალაქების მშენებლობისათვის საჭირო ღონისძიებების განხორციელება, ინფრასტრუქტურის სამინისტროს სსიპ საქართველოს მუნიციპალური განვითარების ფონდს დაევალა.
მთავრობის დავალების შესაბამისად, ქუთაისსა და რუსთავში საუნივერსიტეტო ქალაქების მშენებლობისათვის, ფონდი დაიწყებს დეტალური საპროექტო–სახარჯთაღრიცხვო დოკუმენტაციის მომზადებას, სამშენებლო სამუშაოებისა და საზედამხედველო მომსახურების შესყიდვის პროცესს, რაც ორივე ტერიტორიაზე სრულფასოვანი საუნივერსიტეტო ინფრასტრუქტურის შექმნას ითვალისწინებს.
პროექტის განხორციელების შედეგად, ქვეყანაში შეიქმნება თანამედროვე, რეგიონულად განაწილებული საუნივერსიტეტო სისტემა, რომელიც სტუდენტების საერთაშორისო სტანდარტების შესაბამის განათლებას, კვლევით შესაძლებლობებს და სრულფასოვან სტუდენტურ ცხოვრებას უზრუნველყოფს.
ახალი საუნივერსიტეტო კამპუსები მოემსახურება დამატებით 20 ათას სტუდენტს ქუთაისში, რუსთავი კი შეძლებს 40 ათასი სტუდენტის მიღებას“, - ნათქვამია ინფრასტრუქტურის სამინისტროს მიერ პროექტის წარდგენისას პრესრელიზში.
