ნაძალადევის რაიონში, მეტროსადგურ ,,ღრმაღელესთან“ მდებარე სკვერს სრული რეაბილიტაცია ჩაუტარდა. მერიის მიერ გავრცელებული ინფორმაციით, რეკრეაციული სივრცის მოწყობისთვის 1 723 390 ლარი დაიხარჯა.
მერიის ცნობით, დასასვენებელი სივრცე თბილისის მერმა კახა კალაძემ, მოადგილეებთან - ირაკლი ბენდელიანთან, კახა გულედანთან, ანდრია ბასილაიასთან და ადგილობრივ მოსახლეობასთან ერთად გახსნა. დასრულებული პროექტი, დედაქალაქის მერთან ერთად, ნაძალადევის რაიონის გამგებელმა ირაკლი ანდღულაძემ და თბილისის საკრებულოს მაჟორიტარმა დეპუტატმა ირაკლი ხელაძემ დაათვალიერეს.
ინფრასტრუქტურული სამუშაოების შედეგად, 7 000 კვ.მ ფართობზე მოეწყო საფეხმავლო ბილიკები, მოსასვენებელი სივრცეები, სარწყავი და გარე განათების სისტემა, დამონტაჟდა შადრევანი, ვიდეომონიტორინგის კამერები, საბავშვო-გასართობი ატრაქციონები და ტრენაჟორები. ჩატარდა კედლების მოხატვისა და გამწვანების სამუშაოები, დაირგო სხვადასხვა სახეობის ხე-მცენარე.
სკვერის გახსნის პარალელურად, ნაძალადევის გამგეობის კულტურის, სპორტისა და ახალგაზრდობის სამსახურის ორგანიზებით, საბავშვო-გასართობი და შემეცნებითი ღონისძიება გაიმართა, რის შემდეგაც რაიონში მცხოვრებლებისთვის ბენდმა ,,ქიმერა“ დაუკრა.
პროექტი კონტრაქტორმა კომპანიებმა „ქუალითი“ და „დავითი“ შეასრულეს, მის განსახორციელებლად ნაძალადევის რაიონის გამგეობის ბიუჯეტიდან, ჯამში, 1 723 390 ლარი დაიხარჯა.
