გმირთა მოედანზე არსებული ესტაკადების ტექნიკური მდგომარეობის გამოკვლევა იგეგმება.
თბილისის მერია მომსახურების სავარაუდო ღირებულების დადგენის მიზნით ბაზრის კვლევას ახორციელებს.
მიმწოდებელმა უნდა შეამოწმოს ბურჯების, სარეგულაციო კედლების, საყრდენი და სავალი ნაწილების, ტროტუარების, მოაჯირების, დეფორმაციული ნაკადებისა და მისასვლელების მდგომარეობა; ამასთანავე, უნდა გამოავლინოს დაზიანებები და დეფექტები.
„მომსახურება მიზნად ისახავს გმირთა მოედანზე არსებული ესტაკადების გამოკვლევა-გამოცდის სამუშაოების განხორციელებას სტატიკურ და დინამიკურ დატვირთვებზე, მათი ტექნიკური მდგომარეობის შესაფასებლად და გამოკვლევა-გამოცდის შედეგების გათვალისწინებით დეტალური საინჟინრო ანგარიშის, საპროექტო გადაწყვეტის და რეკომენდაციების წარმოდგენას“, - აღნიშნულია ტექნიკურ დავალებაში.
კონტრაქტორმა ესტაკადების ტექნიკური მდგომარეობა უნდა შეაფასოს, მოამზადოს დასკვნა და შემდგომი ღონისძიებებისთვის რეკომენდაციები უნდა დაამუშაოს.
ცნობისთვის, გმირთა მოედანზე ესტაკადების ანტისეისმური საყრდენი ნაწილის რეაბილიტაცია იგეგმებოდა. მერიამ 2024 წლის სექტემბერში საპროექტო-სახარჯთაღრიცხვო დოკუმენტაციის შედგენის მომსახურების შესყიდვისთვის ტენდერი გამოაცხადა, რომელშიც მონაწილეობა მხოლოდ ერთმა კომპანიამ შპს „აბსოლუტ სერვისმა“ მიიღო. კომპანიამ ტექნიკური დოკუმენტაციის გამო დისკვალიფიკაცია მიიღო და შესყიდვა ჩავარდა.
